३ लाख ५५ हजारांचा चोरीचा मुद्देमाल मुंबईतून जप्त

मुंबईतून साडेतीन लाखांचा मुद्देमाल जप्त
रूण पराडकरवाडीतील चोरी उघड ; संशयिताची कबुली
सकाळ वृत्तसेवा
लांजा, ता. ९ ः तालुक्यातील रूण पराडकरवाडी येथून चोरीला गेलेला ३ लाख ५५ हजार रुपयांचा सोन्याचा मुद्देमाल पोलिसांनी मुंबईतून जप्त केला आहे.
याबाबत पोलिसांनी दिलेल्या माहितीनुसार, प्रणय संजय पराडकर (वय २५, रा. रूण पराडकरवाडी) याने लांजा पोलिस ठाण्यात तक्रार केली होती. त्यानुसार शेजारी राहणाऱ्या ऋषिकेश अंकुश पराडकर (वय २७, रा. रूण पराडकरवाडी) याने प्रणय पराडकर याच्या घराच्या दरवाजाला लावलेले कुलूप चावीने उघडून त्याच्या घरातील कपाटाच्या लॉकरमध्ये ठेवलेली सुमारे ४५ हजार रुपये किमतीची व ५ ग्रॅम वजनाची सोन्याची चेन चोरून नेली. ‌या तक्रारीनुसार, पोलिसांनी ऋषिकेश अंकुश पराडकर याच्यावर गुन्हा दाखल केला होता. त्यानंतर प्रणय पराडकर याच्या शेजारी राहणाऱ्या दुसऱ्या एका व्यक्तीनेही नंतर तक्रार दिली होती की, त्यांच्या घरातून एक सोन्याचे गंठण चोरीला गेलेली आहे व त्यांच्या घरी संशयित ऋषिकेश पराडकर हा येत-जात होता. त्यानंतर पोलिस तपासात संशयित ऋषिकेश पराडकर याने आपला गुन्हा कबूल केला होता.
ऋषिकेश पराडकर याने सोन्याच्या दागिन्यांची चोरी केल्याची कबुली दिल्यानंतर पोलिस निरीक्षक नीळकंठ बगळे यांच्या मार्गदर्शनाखाली ६ ऑगस्ट रोजी पोलिस हेडकॉन्स्टेबल नासिर नावळेकर सोबत पोलिस हेडकॉन्स्टेबल विलास जाधव व पोलिस कॉन्स्टेबल नीतेश आर्डे अशी तपास टीम करून ऋषिकेश पराडकर याने दिलेल्या माहितीनुसार, मुंबई सांताक्रूझ येथे जाऊन गुरूवारी ७ ऑगस्ट रोजी चोरीचा मुद्देमाल ५.३०० ग्रॅम व ३२.६०० ग्रॅम सोन्याची लगड असा सोन्याचा मुद्देमाल जप्त करण्यात आलेला आहे.