क्राईम

वाहतुकीस अडथळा
करणाऱ्यांवर गुन्हा
रत्नागिरी, ता. १० ः लांजा बाजारपेठ येथील सार्वजनिक रस्त्यावर वाहन पार्क करुन रहदारीस व वाहतुकीस अडथळा करणाऱ्या दोघा चालकांविरुद्ध लांजा पोलिस ठाण्यात गुन्हा दाखल करण्यात आला आहे. भारत सिंह नायक (वय २५) व बहादूर सिंग बजारा (वय ३४, दोघेही रा. पानगलेवाडी, लांजा) अशी संशयित चालकांची नावे आहेत. या घटना शनिवारी (ता. ९) दुपारी साडेअकराच्या सुमारास लांजा बाजारपेठ -कोत्रे हॉटेल येथील सार्वजनिक रस्त्यावर निदर्शनास आल्या. पोलिसांकडून मिळालेल्या माहितीनुसार संशयित चालकांनी दोन दुचाकी सार्वजनिक ठिकाणी अडथळा होईल अशा लावल्या होत्या. या प्रकरणी पोलिस कॉन्स्टेबल संतराम पवार यांनी लांजा पोलिस ठाण्यात तक्रार दिली. तक्रारीवरून पोलिसांनी संशयित चालकाविरुद्ध गुन्हा दाखल केला आहे.

हातभट्टीची दारू
लांज्यात जप्त
रत्नागिरी ः लांजा-वैभव वसाहत येथे पोलिसांनी केलेल्या कारवाईत ५ हजार ४४५ रुपयांची विदेशी व गावठी हातभट्टीची दारू जप्त केली. संशयिताविरुद्ध लांजा पोलिस ठाण्यात गुन्हा दाखल करण्यात आला आहे. राजन गजानन कांबळे (वय ४६, रा. बौद्धवाडी, लांजा) असे संशयिताचे नाव आहे. ही घटना शनिवारी (ता. ९) रात्री आठच्या सुमारास लांजा वैभव वसाहत येथील फणसाच्या झाडाखाली एका पडक्या शेडमध्ये निदर्शनास आली. पोलिसांकडून मिळालेल्या माहितीनुसार पोलिसांनी केलेल्या कारवाईत ५ हजार ४४५ रुपयांची हातभट्टीची व विदेशी दारु जप्त केली. या प्रकरणी पोलिस कॉन्स्टेबल सुयोग वाडकर यांनी लांजा पोलिस ठाण्यात तक्रार दिली. तक्रारीवरून पोलिसांनी संशयितांविरुद्ध गुन्हा दाखल केला आहे. अधिक तपास लांजा पोलिस अंमलदार करत आहेत.

विषारीद्रव प्यायलेल्या
वृद्धाचा मृत्यू
रत्नागिरी ः सालपे (ता. लांजा) येथील वृद्धाने विषारी द्रव प्यायल्याने अधिक उपचारासाठी जिल्हा शासकीय रुग्णालयात दाखल केले. तेथील वैद्यकीय अधिकाऱ्यांनी त्यांना तपासून मृत घोषित केले. महेश विठ्ठल घाग (वय ६५, रा. सालपे, ता. लांजा, रत्नागिरी) असे मृत वृद्धाचे नाव आहे. ही घटना शुक्रवारी (ता. ८) सकाळी साडेसहाच्या सुमारास जिल्हा शासकीय रुग्णालयात घडली. पोलिसांकडून मिळालेल्या माहितीनुसार महेश घाग यांनी शनिवारी (ता. २) विषारी द्रव प्यायले, त्यांना अस्वस्थ वाटून लागल्यानंतर प्राथमिक आरोग्य केंद्र शिपोशी-लांजा येथे दाखल केले होते. अधिक उपचारासाठी जिल्हा शासकीय रुग्णालयात दाखल केले होते. वैद्यकीय अधिकाऱ्यांनी शुक्रवारी त्यांना तपासून मृत घोषित केले. लांजा पोलिस ठाण्यात आकस्मिक मृत्यूची नोंद करण्यात आली आहे.