मालवणात दिव्यांग विद्यार्थ्यांची दृष्टीदोषासह वाचादोष चिकित्सा

83595

मालवणात दिव्यांग विद्यार्थ्यांची
दृष्टीदोषासह वाचादोष चिकित्सा

सकाळ वृत्तसेवा
मालवण, ता. १० : राष्ट्रीय शिक्षण धोरण २०२० ला पाच वर्षे पूर्ण झाल्यानिमित्त अखिल भारतीय शिक्षा समागम २०२५ अंतर्गत येथील पंचायत समितीचा शिक्षण विभाग, आरबीएसके ग्रामीण रुग्णालय यांच्या संयुक्त विद्यमाने विशेष गरजा असणाऱ्या विद्यार्थ्यांसाठी आयोजित तालुकास्तरीय दृष्टीदोष आणि वाचादोष तपासणी शिबिरास प्रतिसाद मिळाला. शिबिरात आरबीएसकेच्या वैद्यकीय अधिकारी आणि कर्मचाऱ्यांनी विद्यार्थ्यांची तपासणी केली. शिक्षण विभागातील विशेष शिक्षकांनी विद्यार्थ्यांच्या अडचणी समजून घेऊन पालकांना शैक्षणिक मदत कशी करावी, याबाबत मार्गदर्शन केले. या उपक्रमात गटशिक्षणाधिकारी संजय माने, विषयतज्ज्ञ आरती कांबळी, गौरी नार्वेकर, विशेषतज्ज्ञ विकास रुपनर, स्वप्नील पाटणे आणि इतर कर्मचाऱ्यांसह आरबीएसके ग्रामीण रुग्णालय येथील डॉ. बालाजी पाटील, नेत्र चिकित्सक आदी उपस्थित होते.
.....................
83596

बांद्यातील ८० ज्येष्ठांची
‘आयुष्मान’साठी नोंदणी

बांदा, ता. १० ः येथील ज्येष्ठ नागरिक विकास मंच संस्थेच्या माध्यमातून वयाची सत्तर वर्षे पूर्ण केलेल्या ज्येष्ठ नागरिकांना आयुष्मान भारत प्रधानमंत्री जन आरोग्य योजनेअंतर्गत आयुष्मान वय वंदना कार्ड नोंदणी उपलब्ध करून देण्यासाठी आयोजित शिबिराला उत्स्फूर्त प्रतिसाद मिळाला.
बांदा ग्रामपंचायतीच्या सभागृहात शिबिर झाले. याचा लाभ बांदा पंचक्रोशीतील ८० हून अधिक ज्येष्ठांनी घेतला. मान्यवरांच्या उपस्थितीत दीपप्रज्वलन करून शिबिराचे उद्‍घाटन करण्यात आले. यावेळी बांदा उपसरपंच राजाराम उर्फ आबा धारगळकर, ज्येष्ठ नागरिक संघाचे अध्यक्ष अन्वर खान, उपाध्यक्ष हनुमंत सावंत, सावंतवाडी ग्रामीण उपजिल्हा रुग्णालयच्या नमिता धुरी, ज्येष्ठ नागरिक संघाचे सचिव गुरुनाथ नार्वेकर आदी उपस्थित होते. उपसरपंच धारगळकर यांनी, ज्येष्ठ नागरिक संघाने समाजातील सर्वस्तरातील घटकांसाठी समाजाभिमुख उपक्रम राबविले आहेत. त्यांचे कार्य हे कौतुकास्पद आहे, असे सांगितले. नमिता धुरी यांनी मार्गदर्शन केले. श्री. नार्वेकर यांनी आभार मानले.