सिंधुदुर्ग फळप्रक्रिया उत्पादकांची प्रशिक्षण कार्यशाळा उत्साहात

83666

सिंधुदुर्ग फळप्रक्रिया उत्पादकांची
प्रशिक्षण कार्यशाळा उत्साहात
कुडाळातील उपक्रमः विविध शासन योजनांची माहिती
सकाळ वृत्तसेवा
देवगड, ता. ११ः सिंधुदुर्ग जिल्हा फळ प्रक्रिया उत्पादक संघातर्फे कुडाळ येथील वासुदेवानंद ट्रेड सेंटर येथे ‘फळे व अन्न प्रक्रिया अभियांत्रिकी व उपयुक्त रसायने’ या विषयावर एकदिवसीय प्रशिक्षण कार्यशाळा उत्साहात झाली. कार्यशाळेमध्ये जिल्ह्यातील सुमारे ३५ फळ प्रक्रिया उद्योजक सहभागी झाले.
सकाळी ९ ते सायंकाळी ५.३० या वळेत ही कार्यशाळा झाली. या कार्यशाळेस मार्गदर्शन करण्यासाठी पुणे येथून सुश्री स्नेहा जाधव उपस्थित होत्या. प्रशिक्षणामध्ये फळे व अन्न प्रक्रियेमधील अभियांत्रिकीची मूलतत्त्वे, अभियांत्रिकीतील उपकरणे व तंत्रज्ञान, उपयुक्त अन्न रसायने-ओळख व सुरक्षित वापर, गुणवत्ता नियंत्रण प्रक्रिया व प्रयोगशाळा चाचण्या याबाबत सविस्तर मार्गदर्शन करण्यात आले.
कार्यक्रमाच्या समारोपावेळी ओरोस येथील जिल्हा उद्योग केंद्राचे महाव्यवस्थापक श्रीपाद दामले, जिल्हा उद्योग केंद्राचे व्यवस्थापक श्री. पत्की उपस्थित होते. त्यांनी उद्योजकांना शासनाच्या विविध योजनांची माहिती दिली. तसेच विविध योजनांचा लाभ घेण्यासाठी आवश्यक सहकार्य करण्याचा विश्वास व्यक्त केला.
कार्यक्रमाच्या यशस्वीतेसाठी फळ प्रक्रिया संघाचे जिल्हाध्यक्ष श्रीधर ओगले, सचिव दीनानाथ गावडे व खजिनदार हर्षल हिंदळेकर यांनी परिश्रम घेतले. उपस्थित उद्योजकांना फळ व अन्न प्रक्रिया क्षेत्रातील अत्यंत उपयुक्त आणि प्रत्यक्ष कामात लागू होणारे ज्ञान मिळाल्याचे समाधान श्री. ओगले यांनी व्यक्त केले.