विद्यार्थ्यांनी शासकीय अधिकाऱ्याचे स्वप्न पहावे

- Rat१२p१६.jpg -
P२५N८३९०६
मंडणगड : येथे झालेल्या कार्यक्रमात विद्यार्थ्यांना मार्गदर्शन करताना मुख्याधिकारी अभिजित कुंभार. सोबत प्राचार्य डॉ. वाल्मीक परहर व अन्य मान्यवर.
---
विद्यार्थ्यांनो अधिकारी होण्याचे स्वप्न पहा
अभिजित कुंभार ः ग्रामीण भागात बौद्धिक संपदा
सकाळ वृत्तसेवा
मंडणगड, ता. १२ ः ग्रामीण भागातील विद्यार्थ्यांची बौद्धिक संपदा लक्षात घेता त्यांनी शासकीय अधिकारी होण्याचे ध्येय निश्चित करून त्या दृष्टीने निरंतर वाटचाल करावी, असे प्रतिपादन मंडणगड नगरपंचायतीचे मुख्याधिकारी अभिजित कुंभार यांनी केले.
लोकनेते गोपीनाथजी मुंडे कला, वाणिज्य व विज्ञान महाविद्यालयात आयोजित स्पर्धा परीक्षा : विविध संधी या विषयावर आयोजित व्याख्यानात ते बोलत होते. या वेळी महाविद्यालयाचे प्रभारी प्राचार्य डॉ. वाल्मीक परहर, डॉ. मुकेश कदम, डॉ. विनोदकुमार चव्हाण, ग्रंथपाल डॉ. दगडू जगताप आदी उपस्थित होते. या प्रसंगी कुंभार म्हणाले, ग्रामीण भागात राहणाऱ्या गरीब व होतकरू विद्यार्थ्यांसाठी स्पर्धा परीक्षा हे एक उत्तम क्षेत्र आहे. कारण, स्पर्धा परीक्षांच्या माध्यमातून तालुका तसेच जिल्हास्तरावर अधिकारी होण्याची संधी मिळते. यासाठी ग्रामीण भागात स्पर्धा परीक्षांचे बीज रुजणे अतिशय आवश्यक आहे. जिद्दीने अभ्यास केला तर कोणत्याही परिस्थितीत स्पर्धा परीक्षेत नक्की यश मिळवता येते. इंटरनेटचा प्रसार ग्रामीण भागातही झाल्याने विद्यार्थ्यांना अभ्यास साहित्याची कमतरता भासणार नाही. तसेच विद्यार्थ्यांनी आपल्या ज्ञानाची व विचारांची मर्यादा वाढवणे गरजेचे असून आपल्याला कोणत्या क्षेत्रात जायचे आहे हे आधी ठरवून त्यासाठी प्रयत्न केले पाहिजेत, असे त्यांनी सांगितले.
महाविद्यालयाचे स्पर्धा परीक्षा विभागप्रमुख डॉ. भरतकुमार सोलापुरे यांनी कार्यक्रमाचे प्रास्ताविक केले. डॉ. विनोदकुमार चव्हाण यांनी कार्यक्रमाचे सूत्रसंचालन केले. आभार प्रदर्शन डॉ. मुकेश कदम यांनी केले. कार्यक्रमास शिक्षक-शिक्षकेतर कर्मचारी व विद्यार्थी उपस्थित होते.