क्राइम

सार्वजनिक ठिकाणी
मद्य पिणाऱ्यावर गुन्हा
रत्नागिरी ः तालुक्यातील चांदेराई ते फणसस्टॉप जाणाऱ्या रस्त्यावर मद्यपान करणाऱ्या तरुणाविरुद्ध ग्रामीण पोलिस ठाण्यात गुन्हा दाखल करण्यात आला आहे. सुरेल संजय पवार (वय ३६) असे संशयिताचे नाव आहे. ही घटना सोमवारी (ता. ११) रात्री आठच्या सुमारास चांदेराई ते फणसस्टॉप रस्त्यावर काजळी नदीच्या बाजूला झुडपांच्या आडोशाला निदर्शनास आली. पोलिसांकडून मिळालेल्या माहितीनुसार, संशयित तरुणाकडे मद्यपानाचा परवाना नसताना सार्वजनिक ठिकाणी मद्यपान करत होता. या प्रकरणी पोलिस हेडकॉन्स्टेबल रूपेश भिसे यांनी ग्रामीण पोलिस ठाण्यात तक्रार दिली. तक्रारीवरून पोलिसांनी संशयितांविरुद्ध गुन्हा दाखल केला आहे.

कामगाराचा मृत्यू
रत्नागिरी ः शहरानजीकच्या मिऱ्याबंदर येथील एका कंपनीत काम करणाऱ्या कामगाराच्या अचानक छातीत दुखू लागले. तेथील कामगारांनी त्याला तत्काळ उपचारासाठी जिल्हा शासकीय रुग्णालयात दाखल केले होते. तेथील वैद्यकीय अधिकाऱ्यांनी त्यांना तपासून मृत घोषित केले. नामदेव गणपत बारगुडे (वय ५२, रा. साठरेबांबर, ठोंबरेवाडी, पाली, रत्नागिरी. सध्या मिऱ्याबंदर रत्नागिरी) असे मृत कामगाराचे नाव आहे. ही घटना रविवारी (ता. १०) रात्री घडली. शहर पोलिस ठाण्यात आकस्मिक मृत्यूची नोंद करण्यात आली आहे.

तरुणाचा आकस्मिक मृत्यू
रत्नागिरी ः तालुक्यातील कांबळे-लावगण येथे घरातच बेशुद्धावस्थेत पडलेल्या तरुणाला उपचारासाठी वाटद-खंडाळा येथील प्राथमिक आरोग्यकेंद्रात दाखल करण्यात आले होते. तेथील वैद्यकीय अधिकाऱ्यांनी त्यास तपासून मृत घोषित केले. संदेश सूर्यकांत बलेकर (वय ३२, रा. कांबळे-लावगण, बलेकरवाडी-खालचीवाडी, रत्नागिरी) असे मृत तरुणाचे नाव आहे. ही घटना सोमवारी (ता. ११) घडली. पोलिसांकडून मिळालेल्या माहितीनुसार, बलेकर हा मुंबईत राहात होता. जुलै २०२५ मध्ये कांबळे लावगण येथे मूळ घरात आला होता. सोमवारी त्याचा कोणताही आवाज येत नसल्याने पोलिस पाटील सुहानी बलेकर यांच्या मदतीने दरवाजा उघडून पाहिले असता तो बेशुद्धावस्थेत आढळला. त्याला प्राथमिक आरोग्यकेंद्र वाटद-खंडाळा येथे दाखल केले असता तेथील वैद्यकीय अधिकाऱ्यांनी त्यास तपासून मृत घोषित केले. जयगड पोलिस ठाण्यात आकस्मिक मृत्यूची नोंद करण्यात आली आहे.