-क्राईम

मोटारीच्या धडकेत
दुचाकीस्वाराचा मृत्यू
चिपळूण ः मुंबई-गोवा महामार्गावर सावर्डे येथे श्री हॉस्पिटलसमोर मोटारीच्या धडकेत गंभीर जखमी झालेल्या दुचाकीस्वाराचा उपचारादरम्यान मृत्यू झाला. याबाबत सावर्डे पोलिस ठाण्यात नोंद करण्यात आहे. अज्ञात मोटारचालकाविरोधात गुन्हा दाखल करण्यात आला आहे. सखाराम बिरू बोडेकर (४०, रा. तळवडे, हरपुडे संगमेश्वर) असे मृत्यू झालेल्या दुचाकीस्वाराचे नाव आहे. याबाबत सावर्डे पोलिस ठाण्यातील साहाय्यक पोलिस फौजदार सुभाष भुवड यांनी दिलेल्या फिर्यादीनुसार, १६ जुलैला सायंकाळी ७.३० वाजता सावर्डेत हॉस्पिटलसमोर हा अपघात घडला. बोडेकर हे दुचाकीने अडरे ते तळवडे असा प्रवास करत होते. त्याचवेळी त्यांना कोणीतरी अज्ञात मोटारचालकाने पाठीमागून धडक दिली. त्यात ते रस्त्याबाहेर फेकले गेले. यामध्ये त्यांच्या डोक्याला व उजव्या हाताला गंभीर दुखापत झाली होती. त्यांना तत्काळ डेरवण रुग्णालयात नेण्यात आले; मात्र २२ जुलैला सकाळी ११ वाजता उपचारादरम्यान त्यांचा मृत्यू झाला. त्यानुसार सावर्डे पोलिस ठाण्यात नोंद केली आहे. त्याप्रमाणे अज्ञात मोटारचालकाविरुद्ध गुन्हा दाखल केला आहे.

चिपळूण बाजारपेठेत
दुकानाला आग
चिपळूण ः शहरातील बाजारपेठेतील गांधीचौक परिसरातील गजानन स्टोअर्समध्ये शॉर्टसर्किटने किरकोळ आग लागल्याची घटना मंगळवारी (ता. १२) दुपारी १ वाजता घडली. नगरपालिकेच्या अग्निशमन दलाने तातडीने घटनास्थळी पोहोचून या आगीवर नियंत्रण मिळवले. बाजारपेठेतील गांधीचौक येथील एका कॉम्प्लेक्समध्ये गजानन स्टोअर्सचे दुकान असून, येथे अचानक शॉर्टसर्किटने आग लागली. दुकानात पुस्तके, वह्या व अन्य शैक्षणिक साहित्य तसेच येथे अन्य दुकानेही लागूनच असल्याने या घटनेची माहिती तातडीने नगरपालिकेच्या अग्निशमन दलास देण्यात आली. त्याप्रमाणे बंबासह काही मिनिटातच यंत्रणा घटनास्थळी दाखल झाली. शॉर्टसर्किटने आग लागल्याने या भागातील वीजपुरवठा तातडीने बंद करण्यात आला. त्यानंतर आगीवर नियंत्रण आणण्यात आले. या घटनेत दुकानदाराचे किरकोळ नुकसान झाले आहे.