रस्ता अडवल्याप्रकरणी उपोषणाचा इशारा

रस्ता अडवल्याप्रकरणी
उपोषण छेडण्याचा इशारा

सकाळ वृत्तसेवा
सावंतवाडी, ता. १२ ः घराकडे जाणारा रस्ता बांबूचे कुंपण घालून अडवल्याप्रकरणी कारिवडे येथील उत्तम अनंत कारिवडेकर यांनी एका ग्रामस्थाविरोधात जिल्हाधिकाऱ्यांकडे तक्रार केली आहे. रस्ता पूर्वीप्रमाणे खुला न केल्यास १५ ऑगस्टला तहसील कार्यालयासमोर उपोषण छेडण्याचा इशाराही त्यांनी तक्रारीतून दिला आहे.
श्री. कारिवडेकर यांनी तक्रारीमध्ये म्हटले आहे की, कारिवडे चर्मकारवाडी येथे आपले राहते घर असून, या ठिकाणी इंदिरा गांधी आवास योजनेतून घर बांधले आहे. पूर्वी या ठिकाणीच वडिलांच्या मालकीचे मातीचे घर होते. ते मातीचे घर सुमारे पन्नास वर्षांपूर्वीचे होते. त्या घराकडे जाण्यासाठी चार फूट रुंदीचा रस्ता पन्नास वर्षांपासून अस्तित्वात होता. हा रस्ता यापूर्वी कधीच अडवला नव्हता. मात्र, संबंधित व्यक्तीने या जमिनीच्या परिसरात गुरांसाठी गोठा बांधला असून त्याच्या बाजूला गुरांचे शेण साठवण्यासाठी खड्डा खोदला आहे. यामुळे परिसरात दुर्गंधी पसरली आहे. आमच्या आरोग्यासही रोगराई निर्माण होण्याची भीती आहे. संबंधिताने शेतीच्या नावाखाली आमच्या घराकडे जाण्यासाठी असलेला रस्ता बांबूचे कुंपण करून पूर्णतः बंद केला आहे. त्यामुळे कुटुंबाला येण्या-जाण्यासाठी रस्ता नाही. माझे वडील वृद्ध असून ते आजारी असतात. पत्नीही आजारी असल्याने त्यांना जाण्या-येण्यासाठी अन्य कोणत्याही पर्यायी मार्ग नाही. रस्ता खुला करण्यासाठी वडिलांनी विनंती केली. मात्र, संबंधिताने दादागिरी करत अशोभनीय भाषा वापरली. त्यामुळे माझ्या कुटुंबाला धोका निर्माण झालेला असून, १५ ऑगस्टपूर्वी हा रस्ता येण्या-जाण्यासाठी खुला करावा. अन्यथा १५ ऑगस्टला तहसीलदार कार्यालयासमोर उपोषण करणार असल्याचे त्यांनी तक्रारीत म्हटले आहे.