गणेशभक्तांसाठी धवणार दोन विशेष मोफत रेल्वे

गणेशभक्तांसाठी धवणार
दोन विशेष मोफत रेल्वे

सकाळ वृत्तसेवा
कणकवली, ता.१३ ः गणेशोत्सवाच्या निमित्ताने मुंबई व परिसरातील चाकरमान्यांना कोकणात पोहोचवण्यासाठी दरवर्षीप्रमाणे यंदाही मोदी एक्स्प्रेस गणपती विशेष रेल्वे सोडण्यात येणार आहे. विशेष म्हणजे, या उपक्रमाचे हे १३ वे वर्ष असून यावर्षी प्रथमच दोन विशेष रेल्वे कोकणवासीयांच्या सेवेसाठी सज्ज होणार आहेत. पालकमंत्री नीतेश राणे यांनी ही माहिती दिली.
श्री.राणे म्‍हणाले, ‘गेल्या १२ वर्षांपासून अविरत सुरू असलेली ही सेवा यंदा अधिक सोयीस्कर करण्यासाठी डबल धमाक्यात येणार आहे. कोकणातील जनतेने लोकसभा व विधानसभा निवडणुकीत दिलेल्या भरभरून पाठिंब्याबद्दल कृतज्ञता म्हणून यंदा दोन विशेष रेल्वे सोडल्या जातील. सर्व प्रवासी भक्तांसाठी मोफत जेवण व पाण्याचीही व्यवस्था करण्यात येईल.’ ते म्‍हणाले, ‘२३ आणि २४ ऑगस्ट अशा दोन दिवशी सकाळी ११ वाजता दादर रेल्वे स्थानकावरून या रेल्वे सुटणार आहेत. सोमवारी (ता.१८) पासून नागरिकांनी आपापल्या मंडळ अध्यक्षांकडे नाव नोंदणी करावी. शनिवार (ता.२३) दादर रेल्वे स्टेशन प्लॅटफॉर्म क्रमांक १४ वरून सकाळी ११ वाजता सुटणारी रेल्वे रत्नागिरी आणि कुडाळला थांबेल. या गाडीचा अंतिम थांबा सावंतवाडी असेल. तसेच रविवारी (ता.२४) दादर रेल्वे स्टेशन प्लॅटफॉर्म क्रमांक १४ वरून सकाळी ११ वाजता सुटणारी रेल्वे वैभववाडी व कणकवली येथे थांबेल. या डबल धमाका स्पेशल मोदी एक्स्प्रेसचा लाभ सर्व कोकणवासीयांना घ्यावा.’