एसटीचालक, वाहकांना खारेपाटणमध्ये रक्षाबंधन

84284

एसटीचालक, वाहकांना
खारेपाटणमध्ये रक्षाबंधन
सकाळ वृत्तसेवा
तळेरे, ता. १३ : खारेपाटण पंचक्रोशी शिक्षण प्रसारक मंडळ संचलित शेठ न. म. विद्यालयातर्फे रक्षाबंधनाचे औचित्य साधून समाजासाठी अविरत काम करणाऱ्या समाजबांधवांचा राखी बांधून अनोख्या पद्धतीने सन्मान करण्यात आला. हा उपक्रम खारेपाटण हायस्कूलच्या मुलींमार्फत राबविण्यात आला. वर्षभर प्रवाशांसाठी सेवा देणाऱ्या राज्य परिवहन महामंडळाचे नियंत्रक, चालक, वाहक यांचा प्रशालेतील स्काऊट-गाईड विभागाच्या विद्यार्थिनींनी राखी बांधून सन्मान केला. जनतेच्या सुरक्षिततेसाठी सदैव तत्पर असणारे पोलिस आणि रिक्षाचालकांनाही रक्षाबंधन केले. यावेळी प्रशालेतील शिक्षक उपस्थित होते. या अनोख्या उपक्रमाबद्दल खारेपाटण पंचक्रोशी शिक्षण प्रसारक मंडळाचे अध्यक्ष प्रवीण लोकरे, उपाध्यक्ष भाऊ राणे, सचिव महेश कोळसुलकर, सर्व विश्वस्त, प्रा. संजय सानप, पर्यवेक्षक संतोष राऊत व शिक्षकांनी कौतुक केले.
.....................

swt1325.jpg
84285
फणसगावः माजी सैनिक सीताराम जठार यांचा सत्कार करताना संदेश नारकर.

माजी सैनिक जठारांचा
फणसगाव येथे सत्कार
सकाळ वृत्तसेवा
तळेरे, ता. १३ : कला व वाणिज्य महाविद्यालय फणसगाव येथे क्रांती दिनाचे औचित्य साधून ग्रंथालय विभागामार्फत कृतज्ञता दिवस साजरा करण्यात आला. यावेळी शिरवली गावचे माजी सैनिक सीताराम जठार यांचा संस्थेचे प्रमुख कार्यवाहक संदेश नारकर यांच्या हस्ते शाल व श्रीफळ देऊन सत्कार करण्यात आला. यानिमित्ताने निबंध स्पर्धा घेण्यात आली.
यावेळी नारकर यांनी, क्रांतिकारकांनी जसे आपल्या बलिदानाने देशामध्ये क्रांती केली, त्याचप्रमाणे नवनवीन कलाकौशल्य आत्मसात करून विद्यार्थ्यांनी आपल्या जीवनामध्ये क्रांती घडवून आणण्याचे आवाहन केले. महाविद्यालयाच्या प्राचार्या अनुश्री नारकर यांनी विद्यार्थ्यांना महाविद्यालयातील विविध उपक्रमांची माहिती करून दिली. प्रा. आशिष ढेकणे यांनी विद्यार्थ्यांना भारतावर आलेली परकीय आक्रमणे आणि क्रांतिकारकांनी त्याविरुद्ध केलेला यशस्वी लढा, याविषयी माहिती दिली. माजी सैनिक जठार यांच्या हस्ते भित्तीपत्रकाचे उद्घाटन करण्यात आले. प्रास्ताविक महाविद्यालयाच्या ग्रंथपाल अनुराधा नारकर यांनी, सूत्रसंचालन प्रा. ज्योत्सना कदम यांनी केले. आभार प्रा. सुचिता चव्हाण यांनी मानले.