क्राइम

पैशाच्या व्यवहारातून
प्रौढास मारहाण
रत्नागिरीः शहरातील आयटीआयजवळील रस्ता येथे जमिनीच्या व पैशाच्या व्यवहाराबाबत चर्चेसाठी गेलेल्या प्रौढाला तिघांनी लोखंडी रॉडने मारहाण केली. शहर पोलिसात तीन संशयितांविरुद्ध गुन्हा दाखल केला आहे. स्वप्नील लिगनुरकर (वय २६), सोनाली लिगनुरकर (वय ४५), त्याचा मित्र (नाव-गाव माहित नाही.) अशी संशयितांची नावे आहेत. ही घटना सोमवारी (ता. ११) रात्री आयटीआय-नाचणे रोड, रत्नागिरी येथे घडली. फिर्यादी सुभाष मनोहर खाडे (वय ४०, रा. टेंभ्ये खाडेवाडी, रत्नागिरी) हे संशयितांकडे जमिनीच्या व पैशाच्या व्यवहाराबाबत बोलण्यासाठी नाचणे येथे गेले होते. त्या वेळी संशयितांनी शिवीगाळ करून हाताच्या ठोशाने व लोखंडी रॉडने मारहाण केली. या प्रकरणी सुभाष खाडे यांनी शहर पोलिसात तक्रार ली.
..........
निवेंडी-बौद्धवाडीतील
तरुणाची आत्महत्या
रत्नागिरीः वरची निवेंडी-बौद्धवाडी येथील तरुणाने मद्याच्या नशेत आंबा-काजूच्या बागेतील झाडाला गळफास घेऊन आत्महत्या केली. निखिल मंगेश कदम (वय १९, रा. निवेंडी-बौद्धवाडी, रत्नागिरी) असे मृत तरुणाचे नाव आहे. ही घटना मंगळवारी (ता. १२) सकाळी उघडकीस आली. निखिल कदम याने म्हैसकोंड तळेपाटवाडी, वरची निवेंडी येथील स्वतःच्या मालकीच्या आंबा-काजूच्या झाडाला गळफास घेतला. उपचारासाठी त्याला प्राथमिक आरोग्यकेंद्र वाटद-खंडाळा येथे दाखल केले होते. तेथील वैद्यकीय अधिकाऱ्यांनी त्याला तपासून मृत घोषित केले. जयगड पोलिसात आकस्मिक मृत्यूची नोंद केली आहे.
...
संशयास्पद हालचाल
करणाऱ्यावर गुन्हा
पावसः तालुक्यातील गोळप ते रनपार रस्त्यावर संशयितरीत्या हालचाली व स्वतःचे अस्तित्व लपवणाऱ्या वृद्धाविरुद्ध पूर्णगड सागरी सुरक्षा पोलिसात गुन्हा दाखल केला आहे. सोबान हसन सारंग असे संशयित वृद्धाचे नाव आहे. ही घटना मंगळवारी (ता. १२) रात्री गोळप ते रनपार जाणाऱ्या रस्त्यावर ग्रामपंचायतीच्या पुढील बाजूस निदर्शनास आली. संशयित वृद्धाने तोंडास रुमाल बांधून काळोखात ओळख लपवून संशयास्पद हालचाली करत असताना सापडला. या प्रकरणी पोलिस हेडकॉन्स्टेबल महेश कुबडे यांनी पूर्णगड पोलिसात तक्रार दिली.
....
मावळंगे-गझनेवाडीत
हातभट्टीवर छापा
पावसः मावळंगे-गझनेवाडी येथे पोलिसांनी विनापरवाना हातभट्टीच्या दारूविक्रीवर कारवाई केली. या कारवाईत ४५० रुपयांची चार लिटर दारू जप्त केली. पूर्णगड सागरी सुरक्षा पोलिसात संशयित तरुणाविरुद्ध गुन्हा दाखल केला आहे. प्रज्योत सदानंद गुरव (वय ३६, रा. मावळंगे, गुरववाडी, रत्नागिरी) असे संशयिताचे नाव आहे. ही घटना मंगळवारी (ता. १२) दुपारी गझनेवाडी येथील एका पाखडीच्या आडोशाला निदर्शनास आली. संशयित विनापरवाना हातभट्टीची दारू विक्री करत असताना सापडला.