‘खालिद का शिवाजी’च्या तथ्यहीन संवादांना आक्षेप

84454
देवगड ः येथील नायब तहसीलदार विवेक शेट यांना निवेदन दिले.

‘खालिद का शिवाजी’च्या
तथ्यहीन संवादांना आक्षेप

देवगडमध्ये सकल शिवप्रेमींचे निवेदन

देवगड, ता. १६ ः ‘खालिद का शिवाजी’ या मराठी चित्रपटाच्या विरोधात तालुक्यातील सकल शिवप्रेमींतर्फे येथील तहसीलदारांना निवेदन देण्यात आले आहे. चित्रपटातील काही आक्षेपार्ह संवादाचा हवाला देत या अनुषंगाने काही प्रश्‍न उपस्थित केले आहेत. हे निवेदन नायब तहसीलदार विवेक शेट यांनी स्वीकारले.
नगरसेवक विशाल मांजरेकर, राहुल कदम, राकेश मिराशी, विशाल मिराशी, परेश रुमडे, प्रफुल्ल गोरे, गौरव राणे, सनातन संस्थेचे भास्कर खाडीलकर, हिंदू जनजागृती समितीचे आनंद मोंडकर आदी उपस्थित होते. निवेदनात म्हटले आहे की, नुकत्याच प्रदर्शित झालेल्या ‘खालिद का शिवाजी’ या चित्रपटामध्ये अनेक आक्षेपार्ह संवाद असून, कोणत्याही अस्सल समकालीन संदर्भ किंवा पुराव्यांचा अभ्यास न करता चुकीचा इतिहास मांडला आहे. चित्रपट हे अतिशय प्रभावी माध्यम असल्यामुळे हा चित्रपट पाहून चुकीचा इतिहास पसरवणे, धार्मिक भावना दुखावणे, भावी पिढीची दिशाभूल करणे अशा अनेक गोष्टी घडू शकतात. त्यामुळे ही हानी त्वरित थांबवणे गरजेचे आहे. चित्रपटाच्या नावासह त्यातील संवाद अतिशय संदर्भहीन व कोणत्याही समकालीन पुराव्यांवर आधारीत नाहीत. त्यामुळे निर्माते, दिग्दर्शक, लेखकांनी अस्सल ऐतिहासिक समकालीन पुरावे सादर करावेत; अन्यथा चित्रपट प्रदर्शित होऊ देऊ नये, ही तमाम शिवप्रेमी हिंदूधर्मियांची मागणी आहे.