तरुणांनी कौशल्य शिक्षण घ्यावे

84455

तरुणांनी कौशल्य शिक्षण घ्यावे
शैलेंद्र रावराणेः वैभववाडी महाविद्यालयात कार्यशाळा
सकाळ वृत्तसेवा
वैभववाडी, ता. १४ः येथील तरुणांनी कौशल्यावर आधारीत शिक्षण घेतले पाहिजे. प्रकिया उद्योगांतून इतरांना रोजगाराच्या संधी उपलब्ध द्याव्यात आणि समृद्ध कोकणचे स्वप्न साकार करावे, असे आवाहन महाराणा प्रताप शिक्षण संस्थेचे शैलेंद्र रावराणे यांनी येथे केले.
येथील आनंदीबाई रावराणे महाविद्यालयात गुणवत्ता हमी कक्ष आणि वाणिज्य विभाग यांच्यावतीने प्रधानमंत्री उच्चतर शिक्षा अभियानांतर्गत एकदिवशीय उद्योजकता विकास कार्यशाळेचे आयोजन करण्यात आले. या शिबिराला ६९ प्रशिक्षणार्थी सहभागी झाले. कार्यशाळेला संस्थेचे कोषाध्यक्ष अर्जुन रावराणे, उद्योजक रवींद्र बोभाटे, उद्योजिका अनुपमा मोरे, पांडुरंग मोरे, शरदचंद्र रावराणे, प्राचार्य डॉ. एन. व्ही. गवळी, उपप्राचार्य डॉ. एम. आय. कुंभार, संजय रावराणे, डॉ. ज्ञानेश्वर सिरसाट, डॉ. किरण पाटील उपस्थित होते.
श्री. रावराणे म्हणाले, ‘‘कोकण हा जैवविविधता आणि नैसर्गिक साधनसंपत्तीने समृध्द आहे. आंबा, काजू, फणस, कोकम, जांभूळ, करवंद अशा विविध फळांची उपलब्धता येथे आहे. त्यामुळे येथील तरुणांनी नोकरीच्या मागे धावण्याची गरज नाही. या फळांवर प्रकियेचे शिक्षण घेऊन तरुणांनी रोजगार निर्मितीवर भर दिला पाहिजे. स्वतःबरोबर इतरांना रोजगार निर्माण करून दिल्यास कोकणचा विकास होईल. जागतिक पातळीवर आत्मनिर्भर बनेल.’’
कोषाध्यक्ष रावराणे यांनी, विद्यार्थ्यांनी रोजगाराच्या वाटा शोधल्या पाहिजेत. आपल्या कुटुंबाचे आणि समाजाचे जीवन आर्थिक दृष्ट्या संपन्न करा, असे आवाहन केले. उद्योजक बोभाटे यांनी, कोकणामध्ये दर्जेदार काजू उपलब्ध आहेत. काजू बियांवर प्रक्रिया करून उत्कृष्ट प्रतीचे काजूगर उत्पादन करता येतात, असे सांगत काजू बियांच्या उपलब्धतेपासून प्रत्यक्ष काजूगराच्या निर्मितीपर्यंतची सर्व प्रक्रिया कशा पद्धतीने केली जाते, याची माहिती विद्यार्थ्यांना दिली. उद्योगांमध्ये विपुल प्रमाणात तरुणांना स्वयंरोजगाराची संधी असून चिकाटीच्या आधारे आपला आर्थिक विकास करता येईल, असे मत व्यक्त केले. यावेळी स्टिमिंग, कटिंग, फिनिशिंग, ग्रेडिंग या सर्व प्रक्रियेची माहिती चित्रफितीच्या सहाय्याने दिली. यशस्वी उद्योजक सौ. मोरे आणि श्री. मोरे यांनी लोणचे प्रक्रिया उद्योगाविषयी मार्गदर्शन केले.