वेंगुर्ले खर्डेकर महाविद्यालयाची पुरस्कार निवडीबाबत तपासणी

84480

वेंगुर्ले खर्डेकर महाविद्यालयाची
पुरस्कार निवडीबाबत तपासणी

सकाळ वृत्तसेवा
वेंगुर्ले, ता. १७ ः ‘उत्कृष्ट महाविद्यालय’ पुरस्कार निवड प्रक्रियेअंतर्गत मुंबई विद्यापीठाच्या पडताळणी समितीने नुकतीच येथील बॅ. खर्डेकर महाविद्यालयाला भेट देत शैक्षणिक, प्रशासकीय, संशोधन, क्रीडा, सांस्कृतिक, विद्यार्थी कल्याण, सामाजिक बांधिलकी व पायाभूत सुविधा आदींची पाहणी करून आवश्यक कागदपत्रांची तपासणी केली.
या पडताळणी समितीमध्ये सावित्रीबाई फुले विद्यापीठ पुणेच्या माजी उपकुलगुरू डॉ. एन. एस. उमराणी, व्यवस्थापन परिषदेचे माजी सदस्य प्रा. डॉ. संजय चकाणे, बृहन्महाराष्ट्र कॉलेज ऑफ कॉमर्स पुणेचे प्राचार्य चंद्रकांत रावल यांचा समावेश होता. या समितीला एनसीसी कॅडेट्सनी संचलन करून मानवंदना दिली. प्राचार्य डॉ. डी. बी. गोस्वामी आदींनी स्वागत केले. शिक्षण प्रसारक मंडळाचे पेट्रन कौन्सिल सदस्य दौलतराव देसाई यांनी मान्यवरांचा सत्कार केला. विद्यार्थिनी ऐश्वर्या चव्हाण व सहकाऱ्यांनी स्वागत गीत सादर केले. प्रा. गोस्वामी यांनी महाविद्यालयाचा प्रवास, एनएएसी ‘ए’ ग्रेड, शैक्षणिक व सामाजिक उपक्रम, हरित कॅम्पस, विद्यार्थी प्रगतीची आकडेवारी आणि विशेष कामगिरीचा आढावा सादर केला. विभागप्रमुखांनी आपल्या विभागांच्या शैक्षणिक व संशोधन कार्याची माहिती दिली. समितीचा अहवाल लवकरच मुंबई विद्यापीठाकडे सादर होणार असून, त्यानंतर ‘उत्कृष्ट महाविद्यालय’ हा मानाचा दर्जा मिळण्याची अंतिम प्रक्रिया होणार आहे.