नेरुरच्या शिबिरात ४८ जणांचे रक्तदान

84523

नेरुरच्या शिबिरात ४८ जणांचे रक्तदान
कुडाळ, ता. १७ ः एखाद्या रुग्णाला विशिष्ट रक्तगटाची गरज भासली की रक्तदान किती अमूल्य आहे, हे लक्षात येते. त्यामुळे रक्तदानाचे कार्य म्हणजे साक्षात जीवनदान आहे, असे प्रतिपादन माजी जिल्हा परिषद अध्यक्ष रणजित देसाई यांनी नेरुर येथे केले. रक्तदान शिबिरात ४८ रक्तदात्यांनी रक्तदान केले.
बॅ. नाथ पै संस्था सिंधुदुर्ग संचलित नेरुर येथील (कै.) यशवंतराव नाईक ग्रामीण रुग्णालय व संशोधन केंद्रात श्री. देसाई यांच्या ४८ व्या वाढदिवसाचे औचित्य साधून रणजित देसाई मित्रपरिवाराच्या संकल्पनेतून रक्तदान शिबिराचे आयोजन करण्यात आले. शिबिराचे उद्घाटन (कै.) यशवंराव नाईक यांच्या प्रतिमेला पुष्पहार अर्पून केले. बॅ. नाथ पै शिक्षण संस्थेचे चेअरमन उमेश गाळवणकर, राष्ट्रवादी काँग्रेसचे अमित सामंत, गजानन कांदळगावकर, अभय सामंत, अमित तेंडोलकर, मनोज वालावलकर, गुरू देसाई, पंचायत समिती माजी सभापती संजय वेंगुर्लेकर आदी उपस्थित होते. रणजित देसाई, अमित सामंत यांनी आरोग्य सेवेबद्दल रुग्णांना अपेक्षित असलेल्या विविध समस्यांवर मार्गदर्शन केले व रणजित देसाई मित्रपरिवाराने आतापर्यंत कला, क्रीडा, शिक्षण, आरोग्य, कृषी, रोजगार अशा विविध क्षेत्रांत जनहिताचे अनेक धाडसी निर्णय घेऊन दिलेल्या बहुमोल योगदानाबद्दल कौतुक केले. नेरुर येथील (कै.) यशवंतराव नाईक ग्रामीण रुग्णालय व संशोधन केंद्राच्या माध्यमातून चेअरमन उमेश गाळवणकर यांनी अनेक समस्यांवर मात करत विविध स्तरातील लोकांना दिलेल्या आरोग्य सुविधांबद्दल आभार मानले. श्री. गाळवणकर यांनी देसाई मंडळाच्या कार्याचे कौतुक केले.