-झुंजीदरम्यान २०० फुटावरून पडून २ गव्यांचा मृत्यू

कड्यावरून पडून दोन गव्यांचा मृत्यू
झुंजीचे कारण ; आंबाघाट कळकदरा येथील घटना
सकाळ वृत्तसेवा
रत्नागिरी, ता. १४ ः आंबाघाटातील कळकदरा या ठिकाणी गुरूवारी सकाळी नऊ वाजण्याच्या दरम्यान दोन गव्यांच्यात जोरदार झुंज लागली. या झुंजीदरम्यान दोन्ही गव्यांचा सुमारे २०० फुटाच्या कड्यावरून रस्त्यावर पडून मृत्यू झाला. त्यांचे शवविच्छेदन करून सर्व अवयवांसह वनविभागाने त्यांना दहन केले.
रत्नागिरी-साखरपा-कोल्हापूरकडे जाणाऱ्या (कळकदरा) महामार्गावर उजव्या बाजूला दोन गवे झुंजीदरम्यान कड्यावरून पडून मृत झाले असल्याबाबतची माहिती वनरक्षक वनउपज तपासणीनाका साखरपा यांनी वनपाल संगमेश्वर यांना दिली. मिळालेली माहिती वरिष्ठांना देऊन सर्व कर्मचाऱ्यांनी साहित्यासह जागेवर जाऊन खात्री केली. या ठिकाणी दोन गवे मृतावस्थेत पडले असल्याचे आढळून आले. पशुधन विकास अधिकारी पशुवैद्यकीय दवाखाना श्रेणी एक दाभोळे यांना बोलावून त्यांच्याकडून शवविच्छेदन केले. शवविच्छेदनात गव्यांचा मृत्यू हा झुंजीदरम्यान पडून झालेला असल्याचे पशुवैद्यकीय अधिकारी यांनी सांगितले.
या वेळी घटनास्थळी परिक्षेत्र वनाधिकारी रत्नागिरी प्रकाश सुतार, परिमंडळ वनाधिकारी संगमेश्वर-देवरूख न्हानू गावडे, वनरक्षक साखरपा सहयोग कराडे, वनरक्षक फुणगूस आकाश कडूकर, वनरक्षक दाभोळे सुप्रिया काळे, वनरक्षक आरवली सूरज तेली, वनरक्षक वनउपज तपासणीनाका साखरपा, रणजीत पाटील, महादेव जलने, मिताली कुबल, प्राणीमित्र महेश धोत्रे, दिलीप गुरव, सुतार हे उपस्थित होते. ही कार्यवाही विभागीय वनाधिकारी रत्नागिरी-चिपळूण गिरिजा देसाई तसेच साहाय्यक वनसंरक्षक रत्नागिरी चिपळूण प्रियांका लगड यांच्या मार्गदर्शनाखाली करण्यात आली.