शिक्षणाला सुदृढ आरोग्याची जोड द्या

84573

शिक्षणाला सुदृढ आरोग्याची जोड द्या

संदीप गावडे ः सावंतवाडीत ‘तिरंगा दौड’ मॅरेथॉन स्पर्धा

सकाळ वृत्तसेवा
सावंतवाडी, ता. १६ ः आजच्या स्पर्धात्मक युगात मुलांना शिक्षणासमवेत फिटनेसची अत्यंत गरज आहे. तिरंगा दौडसारख्या मॅरेथॉन स्पर्धेच्या माध्यमातून ती पूर्ण होते, याचा अभिमान आहे. भविष्यात सिंधुदुर्ग जिल्ह्यात चांगले अधिकारी घडावेत, यासाठी आमचे प्रयत्न सुरू आहेत, असे मत ‘हर घर तिरंगा’ उपक्रमाचे जिल्हा संयोजक संदीप गावडे यांनी आज येथे व्यक्त केले.
सिंधुदुर्ग भाजप व महिंद्रा अॅकॅडमीच्या माध्यमातून आयोजित तिरंगा दौड स्पर्धेत मोठ्या गटातून प्रथमेश जाधव व मेघा सातपुते यांनी प्रथम, लहान गटातून दीप सावंत व सौम्या मेस्त्री हे विजयाचे मानकरी ठरले. लहान गट मुलांमधून द्वितीय यश कडव, पृथ्वीराज राठोड, मुलींमधून आस्था लिंगवत व मैथिली गावडे, मोठा गट मुलांमधून प्रणव भालेकर, द्वितीय प्रशांत सुद्रिक, मोठा गट मुलींमधून रेश्मा पांढरे, समीक्षा यांनी यश मिळविले.
येथील जनरल जगन्नाथराव भोसले उद्यानासमोर स्पर्धा झाली. तीन गटांत ही स्पर्धा घेण्यात आली. यात जिल्ह्यातून साडेचारशेहून अधिक स्पर्धक सहभागी झाले. स्पर्धेचे उद्‍घाटन श्री. गावडे यांच्या हस्ते श्रीफळ वाळवून केले. माजी पंचायत समिती सदस्य पंकज पेडणेकर, माजी नगरसेवक मनोज नाईक, जिल्हा बँकेचे संचालक रवी मडगावकर, कंन्झ्युमर्स सोसायटीचे चेअरमन प्रमोद गावडे, महिंद्रा ॲकॅडमीचे संचालक महेंद्र पेडणेकर, सावंतवाडी भंडारी समाजाचे अध्यक्ष प्रसाद अरविंदेकर, सिंधुदुर्ग डिजिटल मीडियाचे जिल्हाध्यक्ष अमोल टेंबकर, शहर अध्यक्ष मोहिनी मडगावकर, दिलीप भालेकर, नयना साळगावकर, अनिकेत आसोलकर, किसन धोत्रे, अभिषेक लाखे, आपा राऊळ आदी उपस्थित होते. विजेत्यांना रोख रक्कम, प्रमाणपत्र व मेडल देऊन गौरविले. शुभम धुरी यांनी सूत्रसंचालन केले. महेंद्र पेडणेकर यांनी आभार मानले.