स्वातंत्र्य दिनाचा कुडाळात जल्लोष

84700

स्वातंत्र्य दिनाचा सोहळा
कुडाळात विविध उपक्रमांनी

सकाळ वृत्तसेवा
कुडाळ, ता. १६ ः तालुक्यात भारताचा ७९ वा स्वातंत्र्यदिन विविध उपक्रमांनी साजरा करण्यात आला. शासकीय, निमशासकीय, खासगी संस्था, शाळा, महाविद्यालये या ठिकाणी ध्वजवंदन करून तिरंग्याला सलामी देण्यात आली. ‘माँ तुझे सलाम’, ‘वंदे मातरम्’, ‘जनगणमन’, ‘बलसागर भारत होवो’ अशी एकाहून एक देशभक्तिपर गीते सादर करत हा सोहळा दिमाखात साजरा केला.
शहरात कुडाळ पंचायत समिती तहसीलदार, नगरपंचायत, गांधी चौक, तालुक्यातील शाळा, शासकीय व खासगी संस्था या ठिकाणी हा ७९ स्वातंत्र्य दिन साजरा झाला. तहसील कार्यालयात प्रांताधिकारी ऐश्वर्या काळुशे यांच्या हस्ते ध्वजवंदन केले. स्वातंत्र्यसैनिक वामनराव तेरसे यांचे नातेवाईक लक्ष्मीकांत तेरसे यांना गौरविण्यात आले. याप्रसंगी तहसीलदार वीरसिंग वसावे आदी उपस्थित होते. कुडाळ नगरपंचायत येथे नगराध्यक्ष प्राजक्ता बांदेकर यांच्या हस्ते ध्वजवंदन सोहळा झाला. यावेळी नगरसेवक, अधिकारी वर्ग, कर्मचारी उपस्थित होते. येथील गिअर अप जिम अँड वेलनेस सेंटर येथे विविध देशभक्तिपर गीतांतून तसेच योगा, व्यायामाची प्रात्यक्षिके करत हा सोहळा साजरा करण्यात आला. जिमचे संचालक साईराज जाधव यांच्यावतीने जिलेबी वाटून सोहळ्याचा आनंद द्विगुणीत केला. यावेळी प्रशिक्षक दर्शन मयेकर, ज्ञानेश्वर आळवेंसह आदी उपस्थित होते.