वेताळबांबर्डे कदमवाडी पूल उभारणार

84702

वेताळबांबर्डे कदमवाडी पूल उभारणार

नीलेश राणे ः पदाधिकाऱ्यांसह ग्रामस्थांचा शिवसेनेत प्रवेश

सकाळ वृत्तसेवा
कुडाळ, ता. १६ ः गेल्या दहा वर्षांत काय झाले, हे पाहण्यापेक्षा यापुढे आपल्या गावाचा विकास कसा होईल. वेताळबांबर्डे कदमवाडी येथील आवश्यक असणारा पूल लवकरच उभारला जाईल, अशी ग्वाही आमदार नीलेश राणे यांनी दिली. यावेळी सुमारे २०० कार्यकर्त्यांनी शिवसेनेमध्ये प्रवेश केला.
वेताळबांबर्डे कदमवाडी ग्रामस्थांनी आमदार राणे यांच्या उपस्थितीत ठाकरे शिवसेनेतून शिंदे शिवसेनेमध्ये प्रवेश केला. यावेळी जिल्हाप्रमुख दत्ता सामंत, महिला जिल्हाप्रमुख दीपलक्ष्मी पडते, सरचिटणीस दादा साईल, माजी जिल्हा परिषद अध्यक्ष संजय पडते, अरविंद करलकर, कुडाळ तालुकाप्रमुख विनायक राणे, नागेश आईर, रचना नेरुरकर, रेवती राणे, माजी सभापती नूतन आईर आदी उपस्थित होते. यावेळी ठाकरे शिवसेनेचे युवा अध्यक्ष भिवा कदम, माजी ग्रामपंचायत सदस्य दिलीप सावंत, माजी उपसरपंच संतोष कदम, माजी उपसरपंच दिनेश कदम, माजी ग्रामपंचायत सदस्य बाबुराव बाबंर्डेकर, माजी ग्रामपंचायत सदस्य देवकी कदम यांच्यासह २०० ग्रामस्थांनी शिवसेनेत प्रवेश केला.
आमदार राणे म्हणाले, ‘दहा वर्षांमध्ये या गावांमध्ये कोणता विकास झाला, कोणता झाला नाही, याबाबत कोणतीही टीका करणार नाही. त्यावेळी कोणते प्रतिनिधी होते आणि तुम्ही प्रामाणिकपणे त्यांचे काम करत होता, हेसुद्धा लक्षात घेणार आहे. मी केवळ विकासाचा अजेंडा घेऊन पुढे जाणारा आमदार आहे. वेताळबांबर्डे गावाच्या विकासासाठी नेहमीच अग्रेसर राहणार आहे. गावाचा दहा वर्षांचा विकासाचा आलेख पूर्ण करण्यासाठी कटिबद्ध आहे. ग्रामस्थांच्या सेवेसाठी नेहमीच तत्पर राहू.’
या प्रवेशावेळी ग्रामस्थांनी आपल्या मागण्या सांगितल्या. आमदार राणे यांच्या कार्यपद्धतीला प्रभावित होऊन हा प्रवेश केला जात असून, या मागण्या त्यांच्याकडून पूर्ण केल्या जातील, असा विश्वास असल्याचे ग्रामस्थांनी सांगितले. विभागप्रमुख नागेश आईर यांनी सूत्रसंचालन केले.