श्‍वानपथकाने उघड केला घरफोड्याचा गुन्हा

84830
श्‍वानपथकाने उघड केला घरफोड्याचा गुन्हा

मळेवाडमधील प्रकार ः पाच हजार चोरणारा पकडला

सकाळ वृत्तेसवा
सावंतवाडी, ता. १६ ः मळेवाड चव्हाणवाडी येथील बंद घर चोरट्याने फोडून पाच हजारांची रक्कम चोरली. याप्रकरणी तेथीलच सचिन केतकर या तरुणाला पोलिसांनी ताब्यात घेतले. ही घटना गुरुवारी (ता. १४) दुपारी तीनच्या सुमारास घडली.
श्‍वानपथकामुळे घरफोड्या सापडला. संशयित केतकर याला शुक्रवारी (ता. १५) येथील न्यायालयात हजर केले असता १५ हजारांच्या जामिनावर त्याला मुक्त केले.
अधिक माहिती अशी की, मळेवाड चव्हाणवाडी येथे चिरेखाणीवर कामानिमित्त वास्तव्य करणारे भाडेकरू वीरेश गौडा हे आपल्या गावी गेले होते. त्यांचे सहकारी कामावर खाणीवर गेले होते. ही संधी साधून चोरट्याने गौडा यांच्या बंद घराचा मागील दरवाजा फोडून आतमध्ये प्रवेश केला. टेबलाच्या ड्रॉव्हरमध्ये असलेली पाच हजार रकमेवर डल्ला मारला. यानंतर स्क्रू ड्रायव्हरने कुलूप लावलेला लोखंडी कपाटाचा दरवाजा उघडून आतील ऐवज नेण्याच्या प्रयत्नात असताना गौडा हे गावाहून घरी आले. घरात कोणीतरी असल्याचे त्यांच्या लक्षात येताच त्यांनी पुढे जाऊन पाहिले असता घरात चोर असल्याचे दिसले. मात्र, तो चलाखीने तेथून पसार झाला. गौडा हे गावात नवखे असल्याने त्यांना संबंधित व्यक्तीचे नाव माहीत नव्हते. त्यांनी ग्रामस्थांना विचारले असता ग्रामस्थांनी तो सचिन केतकर असल्याचा संशय व्यक्त केला. यानंतर आरोंदा पोलिस दूरक्षेत्राचे बीट अंमलदार अरवारी यांना माहिती दिली. अरवारी यांनी पोलिस हवालदार बाबू जाधव यांच्यासमवेत घटनास्थळी दाखल होत पाहणी केली. गौडा यांनी पोलिसांकडे चोरीची फिर्याद दाखल केल्यानंतर पोलिसांनी संशयित केतकर याच्या घरी जात त्याला ताब्यात घेतले. शुक्रवारी (ता. १५) सकाळी श्वानपथक बोलावले. श्वानाने संशयित केतकर याचे घर गाठल्याने त्यानेच चोरी केल्याचे निष्पन्न झाले. सावंतवाडी पोलिस निरीक्षक अमोल चव्हाण यांच्या मार्गदर्शनाखाली पुढील कारवाई करून दुपारी त्याला येथील न्यायालयात हजर केले. न्यायालयाने त्याची १५ हजारांच्या जामिनावर मुक्तता केली.