बांदा-मडुरा मार्गावरील ''तो'' खड्डा बुजवण्याची मागणी

85081

धोकादायक खड्डा जीवघेणा

बांदा-मडुरा मार्गावरील स्थिती, बुजवण्याची मागणी

सकाळ वृत्तसेवा
बांदा, ता. १७ ः बांदा-मडुरा मार्गावरील मडुरा हनुमान मंदिर पुलाजवळ मोठा खड्डा निर्माण झाला असून त्यात पावसाचे पाणी व चिखल साचल्याने वाहनचालक, प्रवासी तसेच शाळकरी मुलांना मोठा त्रास सहन करावा लागत आहे. याच मार्गावरून दररोज शेकडो दुचाकी व चारचाकी वाहने धावतात; मात्र खड्ड्यामुळे अपघात होण्याची शक्यता कायम आहे. रुग्णवाहिका व रुग्णांना घेऊन जाणाऱ्या गाड्यांनाही याच मार्गाने जावे लागते. त्यामुळे जीव धोक्यात घालून प्रवास करण्याची वेळ नागरिकांवर आली आहे. याबाबत ग्रामस्थ आणि प्रवाशांनी सांगितले की, लोकप्रतिनिधी तसेच संबंधित विभागाच्या अधिकाऱ्यांनी या समस्येकडे दुर्लक्ष केले आहे. ग्रामस्थांच्या तक्रारीनंतरच धोकादायक खड्डा बुजविणार काय, असा सवाल वाहनचालकांमधून केला जात आहे. या ठिकाणी रस्त्याची अवस्था अधिकच बिकट झाली आहे. दुचाकीस्वार खड्ड्यात घसरून अपघातग्रस्त होण्याची शक्यता आहे. गणेश चतुर्थी जवळ आल्याने या मार्गावरून प्रवाशांची व चाकरमान्यांचीही मोठ्या प्रमाणावर ये-जा होणार आहे. त्यामुळे सणासुदीच्या काळात तरी तात्पुरती डागडुजी करून हा रस्ता सुरक्षित करावा, अशी मागणी ग्रामस्थांनी केली आहे.