कर्तृत्ववान महिलांचा सन्मान प्रेरणादायी

85221

कर्तृत्ववान महिलांचा सन्मान प्रेरणादायी
पी. के. चौकेकर ः चौकेत ‘अहिल्यादेवी होळकर’ पुरस्काराचे वितरण
सकाळ वृत्तसेवा
मालवण, ता. १८ : ग्रामीण भागांतील महिला सामाजिक जाणिवेतून पुढे येत आहेत, ही अभिमानास्पद बाब आहे. स्वातंत्र्यदिनी अशा कर्तृत्ववान महिलांचा सन्मान करणे आनंददायी आहे. यातून इतरांनाही नक्कीच प्रेरणा मिळेल, असे प्रतिपादन चौके सरपंच पी. के. चौकेकर यांनी केले.
सामाजिक क्षेत्रातील उल्लेखनीय कार्याबद्दल वेदवती गावडे आणि हर्षदा गावडे यांना स्वातंत्र्यदिनी चौके ग्रामपंचायतीच्या वतीने ''पुण्यश्लोक अहिल्यादेवी होळकर महिला सन्मान पुरस्कार'' प्रदान करण्यात आला. जिल्हा महिला व बाल विकास कार्यालय, सिंधुदुर्ग यांच्या निर्देशानुसार हा पुरस्कार सोहळा आयोजित करण्यात आला.
या कार्यक्रमात चौके मांडखोलवाडी येथील माजी ग्रामपंचायत सदस्य वेदवती गावडे यांना त्यांच्या सामाजिक योगदानाबद्दल तर चौके वावळ्याचे भरड येथील बचतगटाच्या माध्यमातून सामाजिक कार्य करणाऱ्या हर्षदा गावडे यांना सन्मानित करण्यात आले. सरपंच चौकेकर यांच्या हस्ते त्यांना सन्मानचिन्ह, शाल आणि श्रीफळ देऊन गौरविण्यात आले.
ग्रामपंचायत कार्यालयात आयोजित या कार्यक्रमासाठी मंडळ अधिकारी श्री. शिंगरे, महसूल अधिकारी श्री. गुरव, ग्रामपंचायत अधिकारी श्री. सरमळकर, सामाजिक कार्यकर्ते बिजेंद्र गावडे, तंटामुक्ती अध्यक्ष नितीन गावडे, संतोष गावडे उपस्थित होते.
कार्यक्रमाची सुरुवात सरमळकर यांनी उपस्थितांचे स्वागत करत पुरस्कारामागची भूमिका स्पष्ट केली. यावेळी चौके पोलिसपाटील रोहन चौकेकर, ग्रामपंचायत सदस्य दुलाजी चौकेकर, विशाखा चौकेकर, जयश्री कदम, अक्षता गायकवाड, सेवानिवृत्त शिक्षक विजय चौकेकर, प्राथमिक शाळेच्या मुख्याध्यापिका सौ. कुनुरे, आरोग्य केंद्राच्या डॉ. चैताली ढोले, महा ई-सेवा केंद्राचे श्री. भगत, विनायक गावडे, मयूर गावडे, महेश सावंत, मोहन गावडे, अंगणवाडी सेविका भारती सुकाळी, सुवासिनी परब, आशा स्वयंसेविका सिद्धाली गावडे, अनिता चौकेकर, नीरा सावंत, स्वप्नील चौकेकर यांच्यासह विविध बचतगटांचे प्रतिनिधी, अंगणवाडी सेविका, आशा स्वयंसेविका, ग्रामस्थ, ग्रामपंचायत कर्मचारी मोठ्या संख्येने उपस्थित होते. सुविधा गावडे यांनी आभार मानले.