कॅथॉलिक बॅंकेला तीन कोटी तीन लाख नफा

85332

तीन कोटी तीन लाखाचा
कॅथॉलिक बॅंकेला नफा

सभासदांना १४ टक्के लाभांश जाहीर

सावंतवाडी, ता. १८ ः कॅथॉलिक अर्बन को. ऑप. क्रेडिट सोसा. लि., सावंतवाडी संस्थेची ३१ वी सर्वसाधारण सभा येथील नवसरणी केंद्रात झाली. संस्थेला निव्वळ नफा ३ कोटी ३ लाख झाला असून सभासदांना १४ टक्के लाभांश जाहीर करण्यात आला. सभा चालू असतानाच लाभांश सभासदांच्या खात्यावर जमा केल्याची माहिती संस्थेने दिली.
या सभेला प्रमुख पाहुणे म्हणून मिलाग्रीस चर्च सावंतवाडीचे पॅरिश प्रिस्ट फादर मिलेट डिसोजा उपस्थित होते. मदर तेरेसा स्कूल वेंगुल्याचे मुख्याध्यापक फा. फॅलिक्स लोबो, रोजरी इंग्लिश स्कूल मालवणचे मुख्याध्यापक ऑल्वीन गोन्साल्विस, मिलाग्रीस हायस्कूल सावंतवाडीचे मुख्याध्यापक रिचर्ड सालदाना, सावंतवाडीचे फिलिप डिसोजा व सेंट फ्रान्सिस झेवियर चर्च आजगांवचे पॅरिश प्रिस्ट इलियास रॉड्रिक्स आदी उपस्थित होते. सभेच्या सुरुवातीला फादर मिलेट यांनी प्रार्थना केली. त्यानंतर दरवर्षीप्रमाणे सभासदांच्या पाल्यांचा शैक्षणिक तसेच क्रीडा क्षेत्रात विशेष प्राविण्य संपादन केल्याबद्दल सत्कार करण्यात आला. २०२४-२५ या आर्थिक वर्षात संस्थेला वेगवेगळ्या स्तरावर तीन पुरस्कार प्राप्त झाले आहेत. संस्थेने स्थापनेपासूनची ऑडिट वर्ग ‘अ’ ची परंपरा कायम राखली आहे. ३१ मार्च अखेर संस्थेने २५० कोटी ठेवींचा टप्पा पार केला आहे. सातत्यपूर्ण कर्ज वसुली, ३ कोटी ०३ लाख निव्वळ नफा, ४० टक्के घरात असलेली संस्थेची गुंतवणूक, १८८ कोटी कर्ज तसेच संस्थेला आदर्श ठरावी व अभिमान वाटावा, अशी सर्व आदर्श प्रमाणे संस्थेने राखली आहेत, अशी माहिती संस्थेच्या अध्यक्षा आनमारी डिसोजा यांनी दिली. चालूवर्षीही सभासदांना १४ टक्के लाभांश जाहीर केला व सभा सुरू असतानाच तो सभासदांच्या खात्यावर जमा केला. मिलेट डिसोजा यांनी संस्थेच्या वाटचालीस शुभेच्छा दिल्या. फॅलिक्स लोबो यांनी कर्मचाऱ्यांचे कौतुक केले. इतिवृत्त वाचन सेक्रेटरी मार्टीन आल्मेडा तर अहवाल वाचन सरव्यवस्थापक जेम्स बॉर्जिस यांनी केले. फॅन्की डॉन्टस यांनी सूत्रसंचालन केले. संस्थेचे संचालक जॉय डॉन्टस यांनी आभार मानले.