टेम्पो-मोटारीच्या धडकेत एकजण जखमी

टेम्पो-मोटारीच्या
धडकेत एकजण जखमी
खेड ः तालुक्यातील खेड-दापोली मार्गावरील फुरूस-सुकदर फाटा येथील मोरीवर छोटा टेम्पोने मोटारीला धडक दिली. यामध्ये मोटारीचा चालक जखमी झाला आहे. हा अपघात रविवारी (ता. १७) दुपारी दीडच्या सुमारास झाला. अपघातातील जखमी अनिकेत मुरलीधर भंडारी (वय ३५, रा. श्रीरामपूर, जि. अहिल्यानगर) हे मोटार घेऊन मुंबईवरून दापोलीकडे जात होते. फुरूस-सुकदर फाटा येथील मोरीवर समोरून येणाऱ्या छोट्या टेम्पोने त्यांच्या मोटारीला धडक दिली. यामध्ये भंडारी जखमी झाले. या प्रकरणी भंडारी यांनी तक्रार दिली असून, टेम्पोचालक सागर आनंद नलावडे (रा. महात्मा फुले नगर, ता. खेड) याच्या विरोधात गुन्हा दाखल केला आहे.
------------
ट्रेलरच्या धडकेत
मोटारचालक जखमी
खेड ः मुंबई-गोवा महामार्गावरील तालुक्यातील आवाशी शेतीशाळेसमोर ट्रेलरच्या धडकेने मोटारचालक जखमी झाला. हा अपघात १७ ऑगस्टला दुपारी पावणेतीनच्या सुमारास झाला. आवाशी मधलीवाडी येथील सुरेश श्रीपत आंब्रे (वय ६०) मोटारीने आवाशी ते खेड रेल्वेस्टेशन असे जात होते. त्या वेळी आवाशी शेतीशाळेसमोरील रस्त्यावर त्यांच्या पाठीमागून आलेल्या ट्रेलरने मोटारीला धडक दिली. या प्रकरणी ट्रेलरचालक सीताराम नामदेव कोडग (वय ३९, सध्या रा. कळंबोली, ता. पनवेल) याच्यावर गुन्हा दाखल करण्यात आला आहे. अपघातात आंब्रे यांच्या डोक्याला किरकोळ दुखापत झाली.
--------------
असगणी येथील
प्रौढाची आत्महत्या
खेड ः तालुक्यातील असगणी येथील प्रौढाने घरात लोखंडी अॅंगलला दोरीने गळफास घेऊन आत्महत्या केली. सचिन शिवराम महाडीक (वय ४३)असे त्या प्रौढाचे नाव आहे. ही घटना १६ ला रात्री साडेआठच्या सुमारास घडली.
-----------------
जखमी झालेल्या
दुचाकीस्वाराचा मृत्यू

खेड ः तालुक्यातील सवेणी येथील नितीन सुरेश गुजर (वय ४३) या दुचाकीस्वाराचा मोटारीला पाठीमागून धडक दिल्याने मृत्यू झाला. सवेणी सिमेचीवाडी येथील नितीन गुजर १२ जुलैला सवेणी येथे दुचाकीवरून जात होते. त्या वेळी त्यांनी पुढे जाणाऱ्या मोटारीला धडक दिली. अपघातानंतर ते बेशुद्ध पडले. त्यांना कराड येथे उपचारासाठी नेण्यात आले होते. तेथून त्यांना कांदिवलीतील रुग्णालयात नेण्यात आले; मात्र ६ ऑगस्टला दुपारी दीड वाजता त्यांचा मृत्यू झाल्याचे डॉक्टरांनी घोषित केले.