-निवृत्त शिक्षिकेच्या खुनप्रकरणातील दुसऱ्या संशयिताला अटक

शिक्षिका खूनप्रकरणातील
दुसऱ्या संशयितास अटक
सकाळ वृत्तसेवा
चिपळूण, ता. १८ ः शहरातील धामणवणे येथील निवृत्त शिक्षिकेच्या खून प्रकरणातील पसार असलेल्या दुसऱ्या संशयिताच्या मुसक्या आवळण्यात चिपळूण पोलिसांना यश आले. कर्नाटकमधील गुलबर्गा जिल्ह्यातील कुलगर्गी येथून रविशंकर कांबळे याला पोलिसांना अटक केली. त्याला न्यायालयाने सहा दिवसांची पोलिस कोठडी सुनावण्यात आली आहे.
धामणवणे येथील निवृत्त शिक्षिका वर्षा जोशी यांचा ६ ऑगस्टला खून झाल्याचे उघड झाले. पोलिसांनी या प्रकरणी अनेकांचे जाबजबाब नोंदवले व ट्रॅव्हल एजंट जयेश गोधळेकर याला त्याच दिवशी ताब्यात घेतले. त्याच्याकडून या प्रकरणात अन्य एक साथीदार असल्याचे पुढे आले. यानंतर दुसरा संशयित रविशंकर कांबळे याचा शोध सुरू झाला. तो मूळचा सातारा येथील होता. मात्र पोलिसांनी केलेल्या तपासात तो सातारा येथे आढळून आला नाही. यानंतर त्याच्या फोनचे सीडीआर मिळवण्यात आले. त्यामध्ये तो अनेकदा कर्नाटकमधील काही लोकांच्या संपर्कात असल्याचे निदर्शनास आले. चिपळूण पोलिसांनी कर्नाटक पोलिसांशी संपर्क साधून अधिक माहिती मिळवली. त्यानंतर चिपळूण पोलिसांचे पथक कर्नाटकात दाखल झाले. गुलबर्गा जिल्ह्यातील कुलगर्गी ही त्याची सासुरवाडी होती. त्यामुळे पोलिसांनी तेथे जाऊन शोध केला. मात्र तो सापडत नव्हता. त्यामुळे सासुरवाडीमध्ये त्याची पत्नी आणि मेहुणा असल्याची माहिती पोलिसांना मिळाली. त्यांनी संशयित कांबळेचा पत्ता मिळवला आणि त्याला ताब्यात घेतले. सोमवारी सकाळी त्याला चिपळूणमध्ये आणून न्यायालयात हजर करण्यात आले.