लांजात पावसाने जनजीवन कोलमडले

लांजात पावसाने जनजीवन कोलमडले
सकाळ वृत्तसेवा
लांजा, ता. १९ ः चार दिवस सुरू असणाऱ्या मुसळधार वादळी पावसाने लांजा तालुक्यातील जनजीवन विस्कळीत झाले. प्रमुख नद्यांनी धोक्याची पातळी गाठली होती. वाहतूक, वीजपुरवठा बंद पडला होता; मात्र कुठेही नुकसान झालेले नाही.
पावसाचे प्रमाण पाहताच जिल्हा, तालुका प्रशासनाने नागरिकांना सतर्कतेचा इशारा दिला होता. मंगळवारी लांजा तालुक्याचा आठवडा बाजार असल्याने पावसामुळे बाजाराकडे नागरिकांचे गर्दीचे प्रमाण कमी दिसून आले. एसटी बसफेऱ्यांवर परिणाम झाला आहे. बसफेऱ्या उशिराने धावल्या. सोमवार ते मंगळवार असे दोन दिवस कोसळलेल्या अतिमुसळधार पावसाने लांजा तालुक्यातील मुचकुंदी, काजळी, बेनीनदी, नावेरी, पालू, सालपे-शिपोशी या प्रमुख नद्यांनी धोक्याची पातळी गाठली होती. त्यामुळे नदीकाठच्या व दुर्गम भागातील गावांना सतर्कतेचा इशारा देण्यात आला होता. महावितरणचा विद्युतपुरवठा अनेक ठिकाणी खंडित झाला होता. पावसामुळे महामार्गासह ग्रामीण मार्गांवरील वाहतूक मंदावली होती.