रेल्वे मार्गावरील पोलिसांकडून गर्दीच्या ठिकाणी पहारा

-rat२५p४.jpg -
२५N८६९११
रत्नागिरी ः कोकण रेल्वेमार्गावर सेवा बजावणाऱ्या रेल्वे पोलिस कर्मचाऱ्यांना सुरक्षेबाबत सूचना करताना पोलिस निरीक्षक सतीश विधाते.
-----
रेल्वेमार्गावर पोलिसांकडून पहारा
कर्नाटकातून जादा कुमक; १२५ कर्मचारी तैनात
सकाळ वृत्तसेवा
चिपळूण, ता. २५ ः कोकण रेल्वेमार्गावरील स्थानकावर ज्या ठिकाणी गर्दी वाढेल त्या ठिकाणी रेल्वे पोलिसांनी उभे राहून गर्दीतील संशयितांवर लक्ष केंद्रित करण्याची सूचना रेल्वे पोलिसांना देण्यात आली आहे, अशी माहिती रेल्वे सुरक्षादलाचे पोलिस निरीक्षक सतीश विधाते यांनी दिली. कोकण रेल्वेमार्गावर जादा पोलिस कर्मचाऱ्यांसह एकूण १२५ पोलिस कर्मचारी तैनात असल्याचे त्यांनी सांगितले. चाकरमान्यांच्या सुरक्षित प्रवासासाठी गोवा आणि कर्नाटक राज्यातून जादा पोलिस कर्मचारी मागण्यात आले आहेत.
गणेशोत्सवासाठी हजारो चाकरमानी कोकण रेल्वेमार्गाने कोकणात दाखल होत आहेत. त्यासाठी रेल्वेची विशेष सेवा सुरू झाली आहे. प्रवाशांना सुरक्षित प्रवास करता यावा यासाठी रेल्वे सुरक्षादलाने पाऊल उचलले आहेत. याबाबत माहिती देताना रेल्वेदलाचे पोलिस निरीक्षक विधाते म्हणाले, कोकण रेल्वेमार्गावरील प्रत्येक स्थानकावर आरपीएफच्या निगराणीखाली सीसीटीव्ही कक्ष उभारण्यात आला आहे. सीसीटीव्हीच्या माध्यमातून आम्ही स्थानकावर येणाऱ्या प्रत्येक प्रवाशावर लक्ष ठेवतो. कोकण रेल्वेमार्गावर होणाऱ्या गुन्हेगारीला आळा घालणे हे या पोलिसांचे मुख्य काम आहे. ज्या ठिकाणी गर्दी असते त्या ठिकाणी जास्त गुन्हे घडतात, त्यामुळे आम्ही कर्मचाऱ्यांना गर्दीच्या ठिकाणी जाऊन उभे राहण्याच्या सूचना केल्या आहेत. गर्दीच्या ठिकाणी कोणी संशयित दिसला तर त्याला ताब्यात घेऊन चौकशी केली जात आहे. आपल्या सुरक्षेसाठी रेल्वेचे पोलिस कर्मचारी कार्यरत आहेत, याची खात्री प्रवाशांना दिली जात आहे. शासनाने रत्नागिरी, रोहा आणि कणकवली या ठिकाणी लोहमार्ग पोलिस ठाण्यांना मंजुरी दिली आहे. कोकण रेल्वेमार्गावर येणाऱ्या अनोळखी आणि परप्रांतीय कामगारांची ओळख पडताळणीसारख्या मोहिमा राबवल्या जात आहेत. कोकणात मोठ्या प्रमाणावर हा सण साजरा केला जातो. या वेळी पोलिस कर्मचाऱ्यांची संख्या अपुरी पडू नये यासाठी कर्नाटक आणि गोव्यातून जादा पोलिस कर्मचारी बोलवण्यात आले आहेत.