बाप्पाच्या आगमनासाठी काही तास शिल्लक

-rat२५p१२.jpg-
२५N८६९२०
रत्नागिरी : टाळ, झांजा खरेदी करताना भाविक.
-rat२५p१४.jpg-
२५N८६९२२
रत्नागिरी : हार, फुले व सजावट साहित्यासाठी दुकानांबाहेर झालेली गर्दी. (मकरंद पटवर्धन : सकाळ छायाचित्रसेवा)
----------

जिल्ह्यातील बाजारपेठा गर्दीने फुलल्या
सजावटीच्या साहित्य खरेदीला पसंती ; चाकरमान्यांचे आगमण
सकाळ वृत्तसेवा
रत्नागिरी, ता. २५ : लाडक्या गणपतीबाप्पांच्या आगमनासाठी आता काही तास शिल्लक राहिले आहेत. त्यामुळे आज रत्नागिरी जिल्ह्यातील महत्त्वाच्या बाजारपेठांमध्ये गर्दी झाल्याचे पाहायला मिळाले. गणेश चतुर्थीनिमित्त लाखो कोकणकर भाविक कोकणात दाखल होऊ लागले आहेत. यामुळे महामार्गासह शहरातील विविध भागांतील रस्त्यांवर वाहनांची वर्दळ सुरू आहे.
मंगळवारी (ता. २६) हरितालिका पूजन होणार आहे. २७ ऑगस्टला बाप्पांची स्वारी भक्तांच्या घरी विराजमान होणार आहे. जिल्ह्यात जवळपास दीड लाखांहून अधिक घरगुती गणपती स्थानापन्न होणार आहेत. बाप्पासाठी लागणारी विविध फळे, पूजा साहित्य, सजावटीचे साहित्य, विद्युत रोषणाई यांसह अनेक प्रकारचे साहित्य खरेदी करण्यासाठी भाविकांची गर्दी झाली.
बाजारपेठेत बाप्पासाठी लागणाऱ्‍या माळा, विविध फुलांचे हार, दागिने, सजावटीसाठी मखरे, रांगोळी, विद्युत रोषणाईसाठी तोरणे, धूप, अगरबत्ती आणि मेवामिठाईने बाजारपेठ सजली. रामआळी ही मुख्य बाजारपेठ असली तरी आता शहरीकरणामुळे अनेक ठिकाणी गणेशोत्सवाकरिता लागणारे साहित्य अनेक ठिकाणी उपलब्ध झाले आहे. मारुती मंदिर, शिवाजीनगर, कुवारबाव या भागांतही बाजारपेठ विकसित झाली आहे.
आता काही चित्रशाळांमध्ये गणेशमूर्तींवर अखेरचा हात मारण्याचे काम सुरू आहे. रात्रीचा दिवस करून मूर्तिकार काम करत आहेत. सार्वजनिक गणेशोत्सव मंडळे मंडप सजावटीची कामे पूर्ण करण्याकडे भर देत आहेत. पोलिसही अनेक ठिकाणी विशेष लक्ष ठेवून आहेत.

चौकट १
रेल्वे, एसटीने कोकणकर दाखल
कोकण रेल्वेने लाखो चाकरमानी कोकणात दाखल झाले तसेच राज्य परिवहन महामंडळानेही मुंबई, बोरिवली, ठाणे, पुण्यातून जादा एसटी गाड्यांची सोय केल्यामुळे सुमारे चार ते पाच लाख कोकणकर भाविक कोकणात दाखल होतील. त्यांच्याकरिता गस्ती पथक, २४ तास नियंत्रण कक्ष सुरू केला आहे.

लांज्यात उत्साह
गणेशोत्सव अवघ्या दोन दिवसांवर आल्याने लांजा तालुका गणेशोत्सवासाठी सज्ज झाला असून, लांजा शहरातील बाजारपेठेमध्ये गणपतीच्या सजावटीचे साहित्य, विद्युत रोषणाईचे सामान आणि पूजेच्या वस्तूंनी दुकाने भरून गेली असून लांजा बाजारपेठ सजली आहे.