अखेर वंदे भारत एक्स्प्रेसला चिपळूण मध्ये थांबा

‘वंदे भारत’ला अखेर चिपळूणमध्ये थांबा
सकाळ वृत्तसेवा
चिपळूण, ता. २६ ः गणेशोत्सवासाठी कोकणात येणाऱ्या प्रवाशांसाठी मुंबई ते मडगाव वंदे भारत एक्स्प्रेस १६ डब्यांसह कोकणात दाखल झाली. वंदे भारत एक्सप्रेसला चिपळूणमध्ये थांबा मिळावा, ही नागरिकांची इच्छा पूर्ण झाली.
मुंबईवरून ही गाडी कोकणच्या दिशेने रवाना झाल्याने कोकणातील जलद प्रवासाची स्वप्नपूर्ती झाली आहे. मुंबई-मडगाव वंदे भारत एक्स्प्रेस सुरू झाल्यापासूनच प्रवाशांचा प्रचंड प्रतिसाद मिळत आहे. ही गाडी नेहमीच पूर्णक्षमतेने धावत असल्याने १६ किंवा २० डब्यांची चालवावी, अशी मागणी नागरिकांनी केली होती. यासाठी कोकण विकास समितीने सातत्याने पाठपुरावा केला होता. अखेर त्याला यश आल्याने या कालावधीत ही गाडी आठऐवजी १६ डब्यांसह धावणार आहे. यामुळे मुंबई-गोवा प्रवासासाठी वंदे भारत एक्सप्रेसमध्ये अधिक जागा उपलब्ध होणार असून, सहा दिवसांत वंदे भारतच्या सहा फेऱ्या धावणार आहेत.
---
चौकट
पनवेल येथे थांबा
गणेशोत्सव आठऐवजी १६ डब्यांची वंदे भारत एक्स्प्रेस चालवण्याचा निर्णय कोकणातील प्रवाशांसाठी महत्त्वाचा ठरला आहे. यामुळे अनेक प्रवाशांना वंदे भारत एक्स्प्रेसचे तिकीट बुकिंग करणे सोपे होणार आहे. या गाडीला पनवेलनंतर थेट चिपळूण येथे थांबा देण्यात आला आहे.