महाराष्ट्र भूषण पुरस्कार द्या ः राणे

रामानंदाचार्य नरेंद्राचार्य महाराजांना
महाराष्ट्र भूषण पुरस्कार द्या ः राणे
सकाळ वृत्तसेवा
रत्नागिरी, ता. २६ ः नाणीज दक्षिणपिठाचे रामानंदाचार्य नरेंद्राचार्य यांना महाराष्ट्राचा सर्वोच्च नागरी सन्मान असलेला ''महाराष्ट्र भूषण पुरस्कार'' प्रदान करावा, अशी विनंती राज्याचे मत्स्य व्यवसाय आणि बंदरविकास मंत्री नीतेश राणे यांनी मुख्यमंत्री देवेंद्र फडणीस यांच्याकडे केली आहे.
मुख्यमंत्री फडणवीस यांना लिहिलेल्या पत्रात मंत्री नीतेश राणे यांनी म्हटले आहे की, रत्नागिरी जिल्ह्यातील नाणीज येथील रामानंदाचार्य नरेंद्राचार्य यांचे आध्यात्मिक तसेच सामाजिक क्षेत्रातील योगदान मोठे आहे. त्यांचे धार्मिक, सांस्कृतिक आणि समाजजागृतीचे कार्य अविरत सुरू आहे. महाराष्ट्रासह संपूर्ण राष्ट्राला याचा अभिमान आहे. गेल्या अनेक दशकांपासून त्यांच्या निःस्वार्थ सेवा आणि समर्पित प्रयत्नांमुळे समाजावर सकारात्मक परिणाम झाला आहे. त्यांनी दोन पिढ्यांना धार्मिक प्रेरणा दिली आहे. समाजात नैतिक मूल्यांची जपणूक त्यांच्यामुळे झाली आहे. महाराष्ट्राच्या धार्मिक, सांस्कृतिक आणि सामाजिक उन्नतीसाठी तसेच लोककल्याणासाठी त्यांनी केलेली कार्ये अत्यंत अनन्यसाधारण आहेत. त्यांच्या आयुष्यभराच्या आध्यात्मिक साधनेसाठी व समाजसेवेसाठी त्यांना हा पुरस्कार देणे हे निश्चितच गौरवाचे ठरेल, अशा शब्दांत मंत्री नीतेश राणे यांनी पत्राद्वारे मुख्यमंत्री फडणवीस यांच्याकडे मागणी केली आहे.