सावंतवाडी पालिकेतर्फे दिव्यांग निधी वितरित

सावंतवाडी पालिकेतर्फे
दिव्यांग निधी वितरित
सकाळ वृत्तसेवा
सावंतवाडी, ता. २६ ः येथील नगरपालिका क्षेत्रातील दिव्यांगांसाठी नगरपालिका फंडातून निधी वाटप करण्यात आला. याचा लाभ तब्बल १२१ दिव्यांग बांधवांना झाला. हा निधी दिव्यांगांना वेळेत मिळावा, याकरिता माजी नगराध्यक्ष बबन साळगावकर यांनी पुढाकार घेतला.
सावंतवाडी नगरपालिका फंडातून दरवर्षी शहरातील दिव्यांगांसाठी निधी वितरित केला जातो. यावर्षी हा निधी गणेश चतुर्थीपूर्वी दिव्यांगांना मिळावा, याकरिता साळगावकर यांनी पालिका प्रशासनाचे लक्ष वेधले. यासाठी त्यांनी वेळोवेळी प्रांताधिकारी तथा प्रशासक हेमंत निकम यांच्याकडे पाठपुरावा केला होता. त्यांनी केलेल्या पाठपुराव्यानंतर शहरातील १२१ दिव्यांगांसाठी बारा लाख दोन हजार एवढा निधी वितरित करण्यात आला. त्यांच्या वर्गवारीप्रमाणे हा निधी खात्यामध्ये जमा करण्यात आला. यासाठी नगरपरिषद कर्मचारी बाबा शेख, अकाउंटंट प्रसाद बटवाल यांचेही मोलाचे सहकार्य लाभले. याबद्दल साळगावकर यांनी सर्वांचे आभार व्यक्त केले.