बांद्यात घरोघरी आरती, भजनांची धूम

swt2820.jpg
87765
बांदाः गणरायाची आरती सादर करताना गणेशभक्त. (छायाचित्र- निलेश मोरजकर)

बांद्यात घरोघरी आरती, भजनांची धूम
पारंपरिकतेचे जतनः गणरायाच्या सेवेत आबालवृध्द रममाण
सकाळ वृत्तसेवा
बांदा, ता. २८ः गणेश चतुर्थी म्हटली की उत्साहाचा आणि आनंदाचा उत्सव. आबालवृद्ध या गणरायाचे स्वागत, पूजन करण्यात मग्न असतात; मात्र आजच्या इंटरनेट व सोशल मीडियाच्या युगातही युवा पिढी एकत्र येत आरती व भजने करताना दिसत आहेत, हे या सणाचे वैशिष्ट्य आहे.
कालानुरूप गणेशोत्सवाचे स्वरुप बदलत चालले आहे. गणेशमूर्ती बनविण्यापासून ते चक्क नैवेद्यापर्यंत सर्व काही ऑनलाईन मिळत असल्याने उत्सवाची पारंपरिकता लोप पावते की काय, असा प्रश्न निर्माण झाला आहे; मात्र आपली पारंपरिक संस्कृती जोपासत सणाच्या कालावधीत घरोघरी आरती व भजनाचे सूर ऐकू येत आहेत. युवाईने यावर्षी देखील त्याच उत्साहाने आपला पारंपरिक साज जपला आहे.
पूर्वीचा काळ हा भजनी बुवांचा म्हटला जायचा. पन्नाशी उलटली की भजनाची ओढ, असे समीकरण असायचे. गेल्या पाच वर्षांत सर्वांवर इंटरनेटचे गारुड असल्याने सर्वच सणांना या आधुनिकतेची झालर लागली आहे. इंटरनेटच्या अतिवापरामुळे युवा पिढी या पारंपरिक भजन कलेपासून दूर जाण्याची भीती व्यक्त होत होती; मात्र सध्या कॉलेज युवकांपासून ते तिशीपर्यंतचे युवक सवाद्य आरती व भजनात रममाण झाल्याचे चित्र ग्रामीण भागात पाहायला मिळत आहे. भलेही तबला, पेटी नसेल, पण बाजारात मिळणाऱ्या रेडिमेड ताशे, ढोलक आणि टाळ यांच्या मदतीने ही युवा पिढी गणरायाची सेवा करताना दिसत आहे.
सोशल मीडियाचा वापर जरी असला तरी आपल्या लाडक्या गणरायाची सेवा करताना ही युवा पिढी रममाण होत असल्याचे चित्र पाहून पुढेही ही पारंपरिक भजन कला जिवंत राहील, अशी आशा भजनी कलाकार व्यक्त करत आहेत.