क्राईम

संशयास्पद वावरणाऱ्या
दोघांवर गुन्हा दाखल
रत्नागिरी ः शहरातील एका टपरीच्या आडोशाला अंधारात अस्तित्व लपवणाऱ्या दोघांविरुद्ध शहर पोलिस ठाण्यात गुन्हा दाखल करण्यात आला आहे. रउफ डोंगरकर व मोहसिन सोलकर अशी संशयित तरुणांची नावे आहेत. ही घटना सोमवारी (ता. २५) रात्री निदर्शनास आली. पोलिसांकडून मिळालेल्या माहितीनुसार, संशयितांकडे चोरी करण्यासाठी लागणाऱ्या साहित्यासह सापडले. त्यांच्याकडे एक दुचाकी, एक लोखंडी हातोडी, स्कू ड्रायव्हर असा २५ हजाराचा मुद्देमाल सापडला. पोलिसांनी चौकशी केली असता उडवाउडवीची उत्तरे दिली. या प्रकरणी पोलिस हेडकॉन्स्टेबल प्रशांत पाटील यांनी शहर पोलिस ठाण्यात तक्रार दिली. तक्रारीवरून पोलिसांनी संशयिताविरुद्ध गुन्हा दाखल केला आहे.

महिलेचा बुडून मृत्यू
पावस ः कालवे काढण्यासाठी खोल पाण्यात गेलेली महिला बुडाली. बेशुद्धावस्थेत त्यांना उपचारासाठी जिल्हा शासकीय रुग्णालयात दाखल केले असता तेथील वैद्यकीय अधिकाऱ्यांनी तपासून मृत घोषित केले. जिलानी जितेंद्र डोर्लेकर (वय ४३, रा. गावडेआंबेरे, खारवीवाडा, रत्नागिरी) असे मृत महिलेचे नाव आहे. ही घटना मंगळवारी (ता. २६) सकाळी साडेनऊच्या सुमारास जिल्हा रुग्णालयात घडली. पोलिसांकडून मिळालेल्या माहितीनुसार, डोर्लेकर या कालवे काढण्यासाठी पूर्णगड खाडीच्या पाण्यात गेल्या होत्या. सकाळी आठच्या सुमारास त्यांचा मुलगा हा त्यांना पाहण्यासाठी तेथे गेला असता त्या खोल पाण्यात बेशुद्धावस्थेत आढळल्या. गावातील लोकांच्या मदतीने त्यांना पाण्याबाहेर काढून उपचारासाठी जिल्हा शासकीय रुग्णालयात दाखल केले. तेथील वैद्यकीय अधिकाऱ्यांनी त्यांना तपासून मृत घोषित केले. या प्रकरणी पोलिस ठाण्यात आकस्मिक मृत्यूची नोंद करण्यात आली आहे.