गौरी पूजनाचा रंगला सोहळा

-rat१p१२.jpg-
२५N८८६३७
रत्नागिरी : शहरातील फगरवठार येथे वारसे बंधूंच्या घरगुती गणेशोत्सवात गौराई आणि सुवासिनी.
--------
घरोघरी गौरी पूजनाचा रंगला सोहळा
महिलांनी साजरा केला आनंदोत्सव ; गोडाधोडाचे जेवण
सकाळ वृत्तसेवा
रत्नागिरी, ता. १ : जिल्ह्यात आज गौरी पूजनाचा सण मोठ्या भक्तिभावाने आणि उत्साहात साजरा झाला. घरोघरी सजवलेल्या गौराईला फुलांनी, फळांनी सजवण्यात आले. खड्यांच्या गौरी व मुखवट्यांची गौराईची पूजा करण्यात महिलांनी आनंदोत्सव साजरा केला. महिलांनी पारंपरिक वेशभूषेत, नऊवारी साड्यांमध्ये आणि दागदागिन्यांत सजून गौरीचे पूजन केले. यानिमित्त सुंदर रांगोळ्याही रेखाटण्यात आल्या.
गौराईला गोडधोड नैवेद्य दाखविण्यात आला. लाडू, करंजी, मोदक, पुरणपोळी यांसारख्या पारंपरिक पदार्थांचा खास थाट मांडण्यात आला. अनेक ठिकाणी महिलांनी एकत्र येऊन पारंपरिक गाणी म्हणत पूजन केले. या प्रसंगी महिलांचा उत्साह ओसंडून वाहताना दिसला.
गौराई पूजनात नवविवाहित वधूंचा सहभाग विशेष लक्षणीय ठरला. त्यांनी प्रथमच सासरी ओवसा करत गौराईला प्रणाम केला. पारंपरिक पद्धतीने केलेल्या या ओवसामध्ये आपुलकी, जिव्हाळा आणि कौटुंबिक बंध दृढ करण्याचा भाव दिसून आला. महिलांनी गौराईसमोर ओवसाची गाणी गात नवविवाहितांना आशीर्वाद दिला. शहरासह ग्रामीण भागातही घराघरात गौराई पूजनाची लगबग सुरू होती. बाजारपेठेत फुलांच्या हार, फळे व पूजन साहित्य खरेदीसाठी महिलांची गर्दी होती. छोट्यांपासून मोठ्यांपर्यंत सर्वांनी या सणाचा आनंद लुटला.