सुवर्णकार नागरी पतसंस्थेच्या अध्यक्षपदी लवेकर

.

सुवर्णकार पतसंस्थेच्या
अध्यक्षपदी लवेकर
चिपळूण, ता. २ ः चिपळूण तालुका सुवर्णकार नागरी सहकारी पतसंस्थेच्या २०२५-२६ ते २०३०-३१ या पंचवार्षिक कालावधीसाठी झालेल्या बिनविरोध निवडणुकीत अध्यक्षपदी राजन गोविंद लवेकर यांची निवड झाली. तर उपाध्यक्ष म्हणून प्रसाद अनंत सागवेकर यांना संधी देण्यात आली.
पतसंस्थेत झालेल्या बैठकीला चिपळूण अर्बन बँकेचे अध्यक्ष मोहन मिरगल, बोर्ड ऑफ मॅनेजमेंटचे अध्यक्ष सतीश खेडेकर व मुख्य कार्यकारी अधिकारी तुषार सूर्यवंशी, पतसंस्थेचे माजी उपाध्यक्ष जितेंद्र वेस्विकर उपस्थित होते. यावेळी श्री. खेडेकर यांनी मार्गदर्शन केले. नव्याने निवड झालेल्या अध्यक्ष, उपाध्यक्षांसह संचालक राजेंद्र वेस्विकर, प्रशांत सागवेकर, संदेश मिर्लेकर, सौरभ मिर्लेकर, नीता पालकर व शिल्पा मिर्लेकर यांचा सत्कार करण्यात आला. उपाध्यक्ष सागवेकर यांनी बँकेच्या मान्यवरांचे आभार मानत, बँक व पतसंस्थेचे संबंध अधिक दृढ करण्याची ग्वाही दिली. सुवर्णकार नागरी पतसंस्थेची स्थापना सुवर्णकार समाजाच्या आर्थिक गरजांसाठी झाली असली तरी आज ही संस्था सर्व समाजघटकांच्या सेवेसाठी कार्यरत असल्याचे त्यांनी नमूद केले.