फोटोग्राफी, रिल्स स्पर्धेचे आयोजन

फोटोग्राफी, रिल्स
स्पर्धेचे आयोजन
सिंधुदुर्गनगरी ः शासनाच्या पर्यटन विभागामार्फत ग्लोबल गणेश फेस्टिव्हल २०२५ या उपक्रमांतर्गत फोटोग्राफी आणि रिल्स स्पर्धेचे आयोजन केले असल्याची माहिती कोकण विभागीय पर्यटन कार्यालयाचे प्रभारी उपसंचालक (पर्यटन) शमा ढोक-पवार यांनी दिली. या स्पर्धेमध्ये महाराष्ट्रातील सार्वजनिक गणेशोत्सवाचे विविध पैलू दर्शविणारे फोटो व रिल्स चित्रित करून सादर करता येतील. सर्वोत्कृष्ट कामगिरी करणाऱ्यांना प्रथम १५ हजार, द्वितीय १० हजार, तृतीय ५ हजार रुपये, अशी बक्षिसे देण्यात येणार आहेत. स्पर्धेत सहभागी होण्याची अंतिम तारीख ६ सप्टेंबर असून निवड झालेल्या स्पर्धकांनी त्यांची नोंदणी ३० सप्टेंबरपर्यंत पूर्ण करणे आवश्यक आहे. अधिक माहितीसाठी संकेतस्थळाला भेट द्यावी किंवा संतोषी येळणे, मेहुल काडगी येथे संपर्क साधावा.
.....................
शिक्षक पात्रता परीक्षेच्या
प्रमाणपत्रांबाबत आवाहन
सिंधुदुर्गनगरी ः महाराष्ट्र राज्य परीक्षा परिषदेच्या वतीने १० नोव्हेंबर २०२४ मध्ये घेतलेल्या शिक्षक पात्रता परीक्षेचा निकाल जाहीर केला आहे. या परीक्षेत पात्र ठरलेल्या उमेदवारांची पात्रता प्रमाणपत्रे जिल्हा शिक्षणाधिकारी (प्राथमिक) कार्यालयात प्राप्त झाली असून, त्यांचे वितरण ८ सप्टेंबरपर्यंत करण्यात येणार असल्याची माहिती शिक्षणाधिकारी (प्राथमिक) डॉ. गणपती कमळकर यांनी दिली. प्रमाणपत्र स्वीकारण्यासाठी उमेदवारांनी स्वत: उपस्थित राहणे आवश्यक आहे. उमेदवारांनी परीक्षा प्रवेशपत्र, गुणपत्रिका, डी. टी. एड, बी. एड उत्तीर्ण प्रमाणपत्र, जात प्रमाणपत्र (लागू असल्यास), दिव्यांगत्व प्रमाणपत्र, माजी सैनिकाचा पुरावा (लागू असल्यास) तसेच आधार कार्ड, पॅन कार्ड किंवा मतदार ओळखपत्र यापैकी कोणतेही वैध ओळखपत्र सोबत आणणे बंधनकारक आहे; अन्यथा उमेदवारांना प्रमाणपत्र देण्यात येणार नाही. पात्र उमेदवारांनी दिलेल्या कालावधीपर्यंत सर्व आवश्यक कागदपत्रांसह उपस्थित राहून प्रमाणपत्र श्री. थोरात यांच्याकडून प्राप्त करून घ्यावे, असे आवाहन शिक्षणाधिकारी (प्राथमिक) विभागाच्या वतीने केले आहे.
.........