क्राईम

नदीत पडून
महिलेचा मृत्यू
गुहागर, ता. ३ ः तालुक्यातील तळवली येथे कपडे धुताना नदीत पडून एका महिलेचा मृत्यू झाला. मंगळवार (ता. ३) सकाळी साडेआठच्या सुमारास ही घटना उघडकीस आली. रेखा गणपत कांबळे (वय ४७, रा. छोटी बौद्धवाडी, तळवली) असे मृत महिलेचे नाव आहे. सकाळी साडेसातच्या दरम्यान त्या कपडे धुण्यासाठी नदीकाठी गेल्या होत्या. त्या नदीत पडल्याने त्यांचा मृत्यू झाला असावा, असा प्राथमिक अंदाज आहे. नदीकिनारी स्मशानशेड असल्याने येथे गेलेल्या काही ग्रामस्थांना सकाळी मृतदेह दिसून आला. त्यांनी त्वरित येथील पोलिस पाटील यांना याबाबत माहिती दिली. पोलिस पाटील घटनास्थळी पोहोचले व घटनेची माहिती गुहागर पोलिसांना कळवली. पोलिस उपनिरीक्षक एस. के. भोपळे यांच्यासह पोलिस कर्मचाऱ्यांनी घटनास्थळी भेट देऊन पंचनामा केला. त्यानंतर मृतदेह तळवली प्राथमिक आरोग्य केंद्रात विच्छेदनासाठी नेण्यात आला.