वाहतूक कोंडी टाळण्यासाठी पोलिस सतर्क

पोलिसांनी कोंडीचा अडथळा केला दूर
देवरूख-साखरपा मार्गावर नियोजन ; वाहनचालकांना दिलासा
सकाळ वृत्तसेवा
संगमेश्वर, ता. ४ ः संगमेश्वर येथून देवरूख-साखरपामार्गे कोल्हापूरकडे जाताना वाहतूककोंडीत जास्त काळ वाहनचालक अडकून राहू नयेत यासाठी महामार्गावर पोलिसपथके कार्यरत होती.
गौरी-गणपतीचे मंगळवारी विसर्जन केल्यानंतर कोकणात गावी आलेले भक्तगण मुंबईच्या दिशेने परतीच्या मार्गावर निघाले. त्यामुळे मुंबई-गोवा राष्ट्रीय महामार्गावर ठिकठिकाणी वाहतूककोंडी होत होती. संगमेश्वर येथून देवरूख-साखरपामार्गे कोल्हापूरच्या दिशेने जाणाऱ्या राज्यमार्गावर लहान-मोठ्या वाहनांनी कोंडी झाली. राष्ट्रीय महामार्गावरील मध्यवर्ती ठिकाण असलेल्या संगमेश्वर येथील चौकीपासून हातखंबा गावाच्या दिशेने जाणाऱ्या रस्त्यावरील हॉटेल स्वाद तसेच मुंबईच्या दिशेने जाणाऱ्या धामणी व राज्यमार्ग देवरूख येथे जाणाऱ्या लोवले रस्त्यावर वाहनांच्या रांगा लागल्या होत्या. संगमेश्वर पोलिस ठाण्याचे पोलिस निरीक्षक राजाराम चव्हाण, महामार्ग पोलिस रियाज मुजावर हे पोलिसपथकाच्या साह्याने वाहतूक सुरळीत करत होते. वाहतूककोंडीत जास्त वेळ वाहनचालकांना अडकून राहता येऊ नये यासाठी चालकांना मार्ग मोकळा करून देण्यात येत होता. त्यामुळे वाहनचालकासंह प्रवाशांनी पोलिसांना धन्यवादही दिले. एकाच ठिकाणी तासनतास उभे राहावे लागत असल्यामुळे वाहनचालकांचा वेळ वाया जातो. त्यावर तोडगा काढण्यात पोलिसांना यश आले.