चिपळूण ःदसरा, दिवाळीसाठी कोकण रेल्वेमार्गावर 2 जादा गाड्या

चाकरमान्यांची होणार दसरा दिवाळी आणखी गोड
कोकण रेल्वेमार्गावर दोन जादा गाड्या ; ९४४ अतिरिक्त फेऱ्या चालवण्याचा निर्णय
सकाळ वृत्तसेवा
चिपळूण, ता. ७ : दसरा, दिवाळी आणि छठपूजा सणांसाठी रेल्वेने ९४४ अतिरिक्त फेऱ्या चालवण्याचा निर्णय घेतला आहे. यातील दोन रेल्वे कोकण रेल्वेमार्गावर धावणार आहेत.
गणेशोत्सवानंतर आता दसरा, दिवाळी आणि छठपूजा हे मोठे सण येत आहेत. या काळात गावी जाणाऱ्या प्रवाशांची मोठी गर्दी होते आणि त्यांना अनेकदा तिकीट मिळत नाही. प्रवाशांची ही गैरसोय टाळण्यासाठी रेल्वे प्रशासनाने एक महत्त्वपूर्ण निर्णय घेतला आहे. पहिली रेल्वे लोकमान्य टिळक टर्मिनस ते तिरुवनंतपूरम नॉर्थ साप्ताहिक विशेष गाडी सोडली जाणार आहे.
गाडी क्र. ०१४६३ ही गाडी २५ सप्टेंबर ते २७ नोव्हेंबर या काळात प्रत्येक गुरुवारी दुपारी ४ वाजता एलटीटीहून सुटेल आणि दुसऱ्या दिवशी रात्री ८.४५ वाजता तिरुवनंतपूरम नॉर्थला पोहोचेल तसेच गाडी क्र. ०१४६४ ही गाडी २७ सप्टेंबर ते २९ नोव्हेंबर या काळात प्रत्येक शनिवारी तिरुवनंतपूरम नॉर्थहून दुपारी ४.२० वाजता सुटेल आणि दुसऱ्या दिवशी रात्री ९.५० वाजता एलटीटीला पोहोचेल. या गाडीला ठाणे, पनवेल, रोहा, चिपळूण, रत्नागिरी, मडगाव, कारवार, मंगलोर, कालिकट आणि कोल्लम येथे थांबे असणार आहेत. दुसरी रेल्वे लोकमान्य टिळक टर्मिनस ते सावंतवाडी रोड अशी साप्ताहिक सोडण्यात येणार आहे. गाडी क्र. ०११७९ ही गाडी १७ ऑक्टोबर ते ७ नोव्हेंबर या काळात प्रत्येक शुक्रवारी सकाळी ८.२० वाजता एलटीटीहून सुटेल आणि त्याच दिवशी रात्री ९ वाजता सावंतवाडी रोडला पोहोचेल तसेच गाडी क्र. ०११८० ही गाडी १७ ऑक्टोबर ते ७ नोव्हेंबर या काळात प्रत्येक शुक्रवारी रात्री १०.२० वाजता सावंतवाडी रोडहून सुटेल आणि दुसऱ्या दिवशी सकाळी १०.४० वाजता एलटीटीला पोहोचेल. रेल्वे ठाणे, पनवेल, रोहा, चिपळूण, रत्नागिरी, वैभववाडी रोड, कणकवली आणि कुडाळ या स्थानकावर थांबणार आहे.