खेमराज मेमोरीयल प्रशालेस जल शुध्दीकरण यंत्र प्रदान

95516

खेमराज मेमोरीयल प्रशालेस
जल शुद्धीकरण यंत्र प्रदान
बांदा, ता. १ ः विद्यार्थ्यांनी कठोर परिश्रम, ध्येयधारणा व प्रामाणिक प्रयत्नांच्या बळावर आयुष्यात मोठे होऊन समाजाला दिशा द्यावी. आपल्या शाळेचे संस्कार व शैक्षणिक पायाभूत योगदान लक्षात ठेवून शाळेकडे मागे वळून पाहण्याचे कार्य करावे, असे प्रतिपादन कोकण कला व शिक्षण विकास संस्थेचे अध्यक्ष तथा सामाजिक कार्यकर्ते दयानंद कुबल यांनी येथे केले.
कोकण कला व शिक्षण विकास संस्थेतर्फे येथील खेमराज मेमोरीयल प्रशालेस आधुनिक वॉटर प्युरिफायर प्रदान करण्यात आला. याप्रसंगी मुख्याध्यापक नंदू नाईक, पर्यवेक्षक प्रमोद सावंत, शिक्षक सूर्यकांत सांगेलकर, शुभा गावडे आदी उपस्थित होते. शिक्षण हाच खऱ्या अर्थाने समाजपरिवर्तनाचा पाया आहे. शाळेतील संस्कार आणि शिक्षकांचे मार्गदर्शन विद्यार्थ्यांना यशाच्या शिखरावर नेते. त्यामुळे आयुष्यात मोठे झाल्यानंतर आपल्या शाळेच्या प्रगतीसाठी योगदान देणे, ही आपली सामाजिक जबाबदारी आहे, असे कुबल यांनी सांगितले. नीलेश मोरजकर, संस्थेचे पदाधिकारी प्रथमेश सावंत, सूरज कदम, प्रीती पांगे, साक्षी पोटे, योगिता निजामकर, पद्माकर शेटकर आदी उपस्थित होते. प्रमोद सावंत यांनी सूत्रसंचालन केले. सूर्यकांत सांगेलकर यांनी आभार मानले.