मालवण कोतवाल संघटनेचा नागपूर आंदोलनास पाठिंबा

95949

मालवण कोतवाल संघटनेचा
नागपूरच्या आंदोलनास पाठिंबा
आचरा, ता. १ ः राज्यातील महसूल सेवक (कोतवाल) यांना चतुर्थश्रेणीचा दर्जा मिळावा, या मागणीसाठी नागपूर विदर्भ संघटनेने पुकारलेल्या आंदोलनाला सिंधुदुर्ग जिल्ह्यातील महसूल सेवकांनी पाठिंबा देत आंदोलनात सहभागी झाले आहेत. मालवण येथील महसूल सेवक संघटनेतर्फे अध्यक्ष समीर गुरव यांच्या मार्गदर्शनाखाली नायब तहसीलदारांना निवेदन दिले.
यावेळी उपाध्यक्ष राहुल चव्हाण, सचिव संतोष नाईक, सहसचिव सचिन चव्हाण, सल्लागार संतोष तांबे, कार्यकारिणी सदस्य सुधीर लब्दे, गीता चौकेकर, स्वप्नील साळकर, श्रीधर नाईक, हेमंत कुंभार, वर्षा रामाणे यांसह अन्य महसूल सेवक उपस्थित होते. याबाबत तालुकाध्यक्ष गुरव यांनी सांगितले की, महसूल सेवक हा २४ तास शासनाचा सेवक आहे; मात्र केवळ पंधरा हजार या तुटपुंज्या मानधनावर तो सेवा बजावत आहे. त्यात मतदान, रात्रपाळी, बीएलओ, पीएम किसान, शासकीय दवंडी यांसह अन्य कामे अल्प मानधनात करावी लागतात. त्यामुळे कोतवालांना शासनाने चतुर्थश्रेणीचा दर्जा द्यावा, यासाठी आमचा लढा आहे.