मराठा आरक्षण निर्णयाची अंमलबजावणी करा

97118

मराठा आरक्षण निर्णयाची अंमलबजावणी करा

मराठा सेवा संघ ः जिल्हाधिकारी धोडमिसे यांना निवेदन

सकाळ वृत्तसेवा
सिंधुदुर्गनगरी, ता. ७ ः मराठा समाजाला इतर मागासवर्ग कोट्यातून आरक्षण देण्याबाबत झालेल्या शासन निर्णयाची सिंधुदुर्ग जिल्ह्यात तत्काळ अंमलबजावणी करावी, अशी मागणी अखिल भारतीय मराठा सेवा संघ सिंधुदुर्गतर्फे जिल्हाधिकारी तृप्ती धोडमिसे यांच्याकडे केली. तसे त्यांना निवेदनही दिले.
अखिल भारतीय मराठा सेवा संघ सिंधुदुर्गतर्फे आज जिल्हाधिकारी धोडमिसे यांची भेट घेत निवेदन सादर केले. निवेदनात म्हटले आहे की, मराठा समाजाच्या मागणीनुसार मराठा समाजाला इतर मागास प्रवर्ग कोट्यातून आरक्षण देण्याबाबतचा शासन निर्णय अलीकडेच निर्गमित झाला आहे. त्याची अंमलबजावणी म्हणून जिल्हा पातळीवर हैदराबाद गॅझेट, सातारा गॅझेट आदींमधील नोंदीवरून मराठा समाजाला दाखले देणे सुरू झाले आहे. सिंधुदुर्ग जिल्ह्यातही कुणबी मराठा, मराठा कुणबी अशा नोंदी आहेत. वर्तमानपत्रातून सिंधुदुर्ग जिल्ह्यात अशा पद्धतीच्या एक लाखपर्यंत नोंदी आढळल्याच्या बातम्या काही काळापूर्वी प्रसिद्ध झाल्या होत्या. त्यानुसार दाखले प्रदान केल्याचे दिसून येत नाही. त्यामुळे मराठा समाज संघटनांतर्फे याकडे लक्ष वेधण्यात येत आहे. याबाबत तत्काळ दखल घेऊन मराठा समाजाला कुणबी मराठा, मराठा कुणबी असे दाखले नोंदीनुसार प्रदान करण्याबाबतचे आदेश सर्व तहसीलदारांना देऊन तत्काळ कार्यवाही सुरू करावी, अशी मागणी केली. यावेळी अखिल भारतीय मराठा सेवा संघाचे एस. एल. सपकाळ, एस. टी. सावंत, लक्ष्मण पावसकर, अविनाश राणे, गजानन राणे, लवू गावडे, विश्वनाथ राऊळ, श्रीधर वारंग, श्रीधर गावडे, बाबुराव वारंग आदी उपस्थित होते.