पालिकेच्या 20 प्रभागांचे आज आरक्षण

राजापुरातील २० प्रभागांचे आज आरक्षण
सकाळ वृत्तसेवा
राजापूर, ता. ७ ः राजापूर नगरपालिकेच्या दहा प्रभागातील २० नगरसेवक पदांसाठीचे आरक्षण पालिकेच्या बॅ. नाथ पै सभागृहात उद्या (ता.८) सकाळी ११ वाजता होणार आहे. या वेळी पीठासन अधिकारी तथा प्रांताधिकारी डॉ. जॅस्मिन हे उपस्थित राहणार आहेत.
गेल्या काही वर्षापासून रखडलेल्या राजापूर नगरपालिकेच्या निवडणुकीची प्रशासनस्तरावर सध्या जोरदार तयारी सुरू आहे. अंतिम प्रभागरचना नुकतीच जाहीर झालेली असताना थेट निवडणूक होत असलेल्या नगराध्यक्षपदाची आरक्षण सोडतही काल जाहीर झाली आहे. त्यात नगराध्यक्षपद सर्वसाधारण महिला यांसाठी आरक्षित झाल्याने अनेक इच्छुकांच्या मनसुब्यांवर पाणी फेरले गेले आहे. आता नगरसेवक पदासाठी आरक्षण सोडत होणार आहे. नव्याने झालेल्या प्रभागरचनेनुसार शहरातील दहा प्रभागांतून २० नगरसेवक निवडून येणार आहेत. या २० नगरसेवक पदांसाठी उद्या आरक्षण सोडत होणार आहे. या सोडतीत ५० टक्के महिला आरक्षणानुसार एकूण जागांपैकी दहा जागा या महिलांसाठी आरक्षित राहणार आहेत. दहा प्रभागांपैकी प्रभाग क्र. ५ मधील एक जागा ही अनुसूचित जाती प्रवर्गासाठी आरक्षित असणार आहे. तर, पाच जागा या नागरिकांचा मागास प्रवर्गासाठी आरक्षित असणार आहेत. यामध्ये दोन नागरिकांचा मागास प्रवर्ग महिला राखीव असणार आहे.