क्राईम

नौकेतील इंजिनची
राजिवडा येथून चोरी
रत्नागिरी ः शहराजवळील राजिवडा येथे मासेमारी जेटीच्या बाजूला पाण्यात उभी करून ठेवलेल्या बोटीवरील ९० हजाराचे इंजिन चोरट्यांने चोरून नेले. याची नोंद रत्नागिरी शहर पोलिस ठाण्यात झाली आहे. ही घटना ४ ते ५ ऑक्टोबर सकाळी साडेसातच्या सुमारास राजिवडा मासेमारी जेटी येथील समुद्राच्या पाण्यात घडली. पोलिसांकडून मिळालेल्या माहितीनुसार, शोएब रियाज फणसोपकर (वय ३३, रा. राजिवडानाका, रत्नागिरी) यांच्या पत्नीच्या नावे असलेली मासेमारी बोट-सना जोया ही शनिवारी (ता. ४) रात्री साडेनऊ ते रविवारी (ता. ५) सकाळी साडेसात या वेळेत समुद्राच्या पाण्यात उभी करून ठेवली होती. चोरट्याने बोटीवरील ९.९ हॉर्स पॉवरचे ९० हजाराचे इंजिन पळवले. या प्रकरणी शोएब रियाज फणसोपकर यांनी शहर पोलिस ठाण्यात तक्रार दिली.

मोटारचालकाविरुद्ध
गुन्हा दाखल
रत्नागिरी ः संगमेश्वर बाजारपेठ ते नावडी जाणाऱ्या सार्वजनिक रस्त्यावर वाहतुकीस अडथळा करणाऱ्या मोटारचालकाविरुद्ध संगमेश्वर पोलिस ठाण्यात गुन्हा दाखल करण्यात आला आहे. अमित संतोष पवार (वय ३५, रा. निढळेवाडी, ता. संगमेश्वर) असे संशयित वाहनचालकाचे नाव आहे. ही घटना सोमवारी (ता. ६) दुपारी साडेचारच्या सुमारास निदर्शनास आली. पोलिसांकडून मिळालेल्या माहितीनुसार, संशयित अमित पवार यांनी मोटार संगमेश्वर बाजारपेठ येथील मुत्तुट फायनान्स बॅंकेजवळील रस्त्यावर वाहतुकीस अडथळा निर्माण होईल, अशी उभी केली होती. या प्रकरणी पोलिस कॉन्स्टेबल अरुण नागरगोजे यांनी संगमेश्वर पोलिस ठाण्यात तक्रार दिली.