ग्रंथ यादीसंदर्भात लेखकांना आवाहन

ग्रंथ यादीसंदर्भात
लेखकांना आवाहन
मुणगे, ता. ८ ः शासनमान्य ग्रंथांच्या यादीकरिता सिंधुदुर्ग जिल्ह्यातील २०२४ या कॅलेंडर वर्षातील प्रकाशित ग्रंथ, लेखक व प्रकाशक यांनी ग्रंथालय संचालनालय महाराष्ट्र यांच्याकडे पाठविण्याचे आवाहन प्र. ग्रंथालय संचालक अशोक गाडेकर यांच्यावतीने सिंधुदुर्ग जिल्हा ग्रंथालय अधिकारी सचिन हजारे यांनी केले आहे. राज्यातील शासकीय व शासमान्य सार्वजनिक ग्रंथालयांना राज्यात मराठी भाषेत प्रकाशित झालेल्या ग्रंथांची माहिती किंवा खरेदीकरिता मार्गदर्शक ठरावी, म्हणून ग्रंथालय संचालनालयाकडून ग्रंथ निवड समितीच्या सदस्यांनी शिफारस केलेली वर्षनिहाय ‘शासनमान्य ग्रंथांची यादी’ प्रकाशित करण्यात येते. यासाठी २०२४ या कँलेडर वर्षात (१ जानेवारी ते ३१ डिसेंबर २०२४) या वर्षात प्रकाशित झालेल्या मराठी भाषेतील ग्रंथांची निवड करण्यासाठी आणि शासनमान्य ग्रंथांच्या यादीत समावेश होण्याच्या दृष्टीने सिंधुदुर्ग जिल्ह्यातील लेखक, प्रकाशक यांनी प्रथम आवृत्ती असलेल्या ग्रंथांची एक प्रत ग्रंथालय संचालक, ग्रंथालय संचालनालय, नगरभवन टाऊन हॉल, मुंबई ४००००१ यांच्याकडे १५ ऑक्टोबरपर्यंत पाठवावी, असे आवाहन हजारे यांनी केले आहे.