कळणे विद्यालयाचा विद्यार्थी मोटारीची धडक बसून गंभीर

97426

कळणे विद्यालयाचा विद्यार्थी
मोटारीची धडक बसून गंभीर

आडाळीत रस्ता ओलांडताना घटना

सकाळ वृत्तसेवा
दोडामार्ग, ता. ८ ः रस्ता ओलांडत असताना मोटारीच्या धडकेत कळणे येथील नूतन विद्यालयाचा विद्यार्थी गंभीर जखमी झाला. मयूर मनोज शेळके ( वय १४ ) असे त्याचे नाव आहे. त्याच्यावर दोडामार्ग ग्रामीण रुग्णालयात प्राथमिक उपचार करून अधिक उचारासाठी गोवा येथे पाठविण्यात आले. ही घटना आज सकाळी दहा वाजण्याच्या सुमारास आडाळी येथे घडली.
याबाबत अधिक माहिती अशी की, आडाळी येथील मयूर शेळके हा शाळकरी विद्यार्थी कळणेतील नूतन विद्यालयात नववीच्या वर्गात शिक्षण घेत आहे. आडाळी ते कळणे असे तीन ते चार किलोमीटरचे अंतर आहे. शाळेत जाण्यासाठी तो नेहमी एसटी बसने प्रवास करतो. रोजच्याप्रमाणे तो शाळेत जाण्यासाठी बाहेर पडला व आडाळी येथील बस स्थानकावर एसटी बसची वाट पाहत उभा होता. एसटी बस येत आल्याचे पाहून बसमध्ये चढण्यासाठी रस्ता ओलांडत असताना एसटीच्यासमोर असलेल्या छोटा हत्ती वाहनाला तो आदळला. धडक बसतच गाडीच्या दर्शनी भागावर त्याचे डोके आदळले व तो रस्त्यावर फेकला गेला. या अपघातात त्याच्या छातीला, डोक्याला व पायांना गंभीर दुखापत झाली. ग्रामस्थांनी तत्काळ त्याला मोरगाव प्राथमिक आरोग्य केंद्राच्या १०२ रुग्णवाहिकेतून दोडामार्ग ग्रामीण रुग्णालयात दाखल केले. येथे त्याच्यावर प्राथमिक उपचार करून अधिक उपचारासाठी त्याला गोवा बांबोळी येथे पाठविले. घटनेची माहिती मिळताच दोडामार्ग पोलिसांनी घटनास्थळी जात अपघाताचा पंचनामा केला.