1.5 लाखाची मच्छीमार जाळी चोरीप्रकरणी गुन्हा

मच्छीमारीची जाळी चोरीप्रकरणी
सिंधुदुर्गातील एकावर गुन्हा
सकाळ वृत्तसेवा
राजापूर, ता. ९ ः कातळीसडा येथे ठेवलेली सुमारे दीड लाख रुपये किमतीच्या दोन मच्छीमारी जाळ्या चोरून नेल्याप्रकरणी संशयितांवर नाटे पोलिस ठाण्यात गुन्हा नोंद झाला. मुबिन अब्दुल सत्तार सोलकर (वय ३०, रा. धाऊलवल्ली मुस्लिमवाडी, ता. देवगड, जि. सिंधुदुर्ग) असे त्याचे नाव आहे.
नाटे पोलिसांनी दिलेल्या माहितीनुसार, तालुक्यातील कातळी येथील नासिर इसहाक मजगावकर मच्छीमारीची जाळी दुरूस्ती व्यवसाय करतात. त्यांच्याकडे सिंधुदुर्ग जिल्ह्यातील मालवण येथील चंद्रशेखर रजनीकांत कुश्ये यांनी पर्ससीन नेट माछीमारीच्या दोन जाळी दुरुस्तीकरिता दिल्या होत्या. मजगावकर यांनी सदर जाळ्या दुरूस्त करून कातळीसडा येथील शब्बीर नाखरेकर यांच्या कंपाउंडच्या मोकळ्या जागेमध्ये काळ्या ताडपत्रीने झाकून ठेवल्या होत्या. दरम्यान, १८ जून ते १६ सप्टेंबर या कालावधीत अज्ञाताने दोन्ही जाळ्या चोरून नेल्याची फिर्याद मजगावकर यांनी नाटे पोलिस ठाण्यात दाखल केली आहे. यामध्ये चोरट्याने जाळे व ६४० किलो वजनी शिसे असा एकूण १ लाख ४७ हजार रुपयांचे साहित्य चोरून नेला आहे. या प्रकरणी पोलिसांनी देवगड येथील संशयित मुबिन अब्दुल सत्तार सोलकर याच्या विरोधात गुन्हा दाखल केला आहे.