‘ओंकार’ पोहचला चव्हाटा मंदिरापर्यंत

98155

‘ओंकार’ पोहचला चव्हाटा मंदिरापर्यंत

ग्रामस्थ थक्क; मडुऱ्यातील व्हिडिओ होतोय व्हायरल

सकाळ वृत्तसेवा
बांदा, ता. १२ ः मडुरा परबवाडी येथे शनिवारी (ता.११) रात्री ‘ओंकार’ हत्ती थेट श्री देव चव्हाटा मंदिरापर्यंत पोहचल्याचा व्हिडिओ व्हायरल झाला आहे. प्रथम मंदिराच्या पायऱ्यांपर्यंत पोहोचून तो सुमारे १० मीटर अंतरावर थांबला. मात्र, ग्रामस्थांनी त्याला हाक दिल्याने पुन्हा माघारी वळला आणि काही क्षणांत पुन्हा मंदिरात गेला. या दृश्याने ग्रामस्थ थक्क झाले. या घटनेने ग्रामस्थांत भक्तिभाव आणि आश्चर्याचे वातावरण निर्माण झाले आहे.
हत्तीला आता मानवी सान्निध्य प्रिय वाटू लागले आहे, असा समज स्थानिकांमध्ये आहे. दरम्यान, वनविभागाला अद्याप हत्तीचा बंदोबस्त करण्यात यश आलेले नाही. मात्र, ग्रामस्थांनी दक्ष राहण्याचे आवाहन केले आहे. ‘ओंकार’ हत्तीचे देवदर्शन हा प्रकार संपूर्ण परिसरात चर्चेचा विषय ठरला असून, श्रद्धा आणि निसर्गातील अद्भुत नात्याचे प्रतीक म्हणून पाहिला जात आहे.
------------
बंदोबस्तासाठी यंत्रणा कधी येणार?
गेल्या सहा दिवसांपासून मडुरा परिसरात फिरणारा हा हत्ती आता पूर्णपणे माणसाळल्याचे दिसून येत आहे. मागील काही दिवसांत शेतीचे नुकसान होत असून वनविभाग मात्र फटाके लावणे आणि रात्रीच्यावेळी बॅटरी दाखविण्याचे काम करत आहे. हत्तीचा बंदोबस्त करण्यासाठी नेमकी यंत्रणा कधी येणार? असा प्रश्‍न मडुरा उपसरपंच बाळू गावडे यांनी केला आहे.