संगमेश्वर-कोकणातील चित्र संस्कृतीचा विद्यार्थ्यांकडून अभ्यास

कोकणातील चित्रसंस्कृतीचा विद्यार्थ्यांकडून अभ्यास
सह्याद्री कला महाविद्यालय; पावसाळी सहलीत साकारल्या अप्रतिम कलाकृती
सकाळ वृत्तसेवा
संगमेश्वर, ता. १४ ः सावर्डे येथील चित्र–शिल्पकला महाविद्यालयाची मान्सून सहल देवरूख परिसरातील डी-कॅड कॉलेज, पालकर फाउंडेशन विघ्रवली आणि ओली माती पॉटरी वर्कशॉप येथे काढण्यात आली होती.
विद्यार्थ्यांनी पित्रे चित्र संग्रहालयाला भेट दिली. या ठिकाणी विद्यार्थ्यांनी कोकणातील चित्रसंस्कृतीचा इतिहास, पारंपरिक तैलचित्रे आणि स्थानिक कलाकारांच्या कलाकृतींचा अभ्यास केला. त्यानंतर विद्यार्थ्यांनी सुंदर निसर्गचित्रे रेखाटली. यानंतर विद्यार्थ्यांनी पालकर फाउंडेशन येथे दुपारनंतर निसर्गचित्र निर्मिती केली. प्रा. विक्रम परांजपे यांनी विद्यार्थ्यांसाठी विशेष चित्र प्रात्यक्षिक सादर केले. सहलीच्या अखेरीस विद्यार्थ्यांनी ओली माती पॉटरी वर्कशॉप येथे सहभाग घेतला. मातीपासून आकारनिर्मिती, टेक्स्चरिंग आणि बर्निशिंगच्या प्रक्रियेतून विद्यार्थ्यांनी शिल्पकलेचे बारकावे आत्मसात केले. या मान्सून सहलीत विद्यार्थ्यांनी साकारलेली चित्रे आणि शिल्पे सह्याद्री कलादालनात मांडण्यात आली आहेत.

चौकट
विद्यार्थ्यांचा गौरव
या प्रदर्शनाच्या उद्घाटनानिमित्ताने गतवर्षी मूलभूत अभ्यासक्रम विभागात उत्कृष्ट कामगिरी करणाऱ्या आणि सलग तीन वर्ष याच महाविद्यालयात शिकणाऱ्या विद्यार्थ्यास प्रज्ञा जोगळेकर यांच्यातर्फे शिष्यवृत्ती देण्यात येते. ही शिष्यवृत्ती ज्योती पांचाळ (शिल्पकला विभाग) आणि आर्यन हरेकर (पेंटिंग विभाग) यांना प्रदान करण्यात आली. या कलाप्रदर्शनात मांडलेल्या चित्रशिल्पांना पारितोषिके देण्यात आली. यामध्ये उत्कृष्ट कलाकृती पारितोषिक नवाज हमदुले, शुभम लिबे, संकेत गोरिवले, प्रथमेश गोंधळी, प्रज्वल घडशी, पंकज सुतार, कृतिका खामकर, विशेष पारितोषिक रूद्र शिगवण, धनंजय नलावडे, भाग्यश्री पाथरवट, ओम बामगुडे यांना पारितोषिक देऊन गौरवण्यात आले.