लक्ष्मीपूजनासाठी सिंधुदुर्गात सज्जता

99833

सिंधुदुर्गात लक्ष्मीपूजनाचा उत्साह शिगेला
बाजारपेठा गजबजल्या; घराघरांत आज होणार श्रीलक्ष्मीचे पूजन
संदीप चव्हाणः सकाळ वृत्तसेवा
म्हापण, ता. १३ : गणेशोत्सवानंतर कोकणात दिवाळी हा सर्वांत मोठा सण मानला जातो. यामध्ये सर्वांत महत्त्वाचा समारंभ म्हणजे लक्ष्मीपूजन. उद्या (ता. २१) घराघरात तसेच दुकाने, व्यवसाय आस्थापनांमध्ये मोठ्या भक्तिभावाने लक्ष्मीपूजन होणार असून खरेदीसाठी बाजारपेठा ग्राहकांनी फुलून गेल्या आहेत.
अश्विनच्या अमावस्येला सायंकाळी लक्ष्मीपूजन केले जाते. देवी महालक्ष्मी ही धन, वैभव व समृद्धीचे प्रतीक मानली जाते. भगवान विष्णूने बळीराजाच्या कैदेतून लक्ष्मीची सुटका केल्याची पौराणिक कथा या पूजनाशी जोडली जाते. घराघरांत या दिवशी अलक्ष्मीचा नाश करून सुख-समृद्धी नांदावी या हेतूने नवीन केरसुणी विकत घेतली जाते व तिची पूजा करून तिला लक्ष्मीचे स्वरूप मानले जाते. त्यामुळे अलक्ष्मीचे उच्चाटन व लक्ष्मीचे स्वागत हा या दिवशीचा मुख्य हेतू असतो. या दिवशी पूजनासाठी हार, फुले, फळे, मिठाई, वह्या, पूजासाहित्य खरेदी केले जाते. त्याचबरोबर आधुनिक काळानुसार टीव्ही, फ्रिज, वॉशिंग मशीन, मायक्रोवेव्ह, व्हॅक्युमक्लिनर यांसारख्या गृहपयोगी वस्तूंच्या खरेदीतही वाढ झाली आहे. बाजारपेठांत खरेदीसाठी मोठी गर्दी होत असून दुकानदारांकडून ग्राहकांना पेढे, चॉकलेट, बत्तासे प्रसाद म्हणून दिले जात आहेत.

चौकट
असे आहेत मुहूर्त
उद्या (ता.२१) लक्ष्मीपूजनासाठी दुपारी ३ ते ४.३०, सायंकाळी ६ ते रात्री ८.३० आणि रात्री १०.३० ते १२ असे शुभमुहूर्त उपलब्ध आहेत. तर २२ ला सकाळी ३ ते ६, सकाळी ६.३० ते ९.३० आणि ११ ते दुपारी १२.३० या वेळेत वहीपूजन केले जाणार आहे.

चौकट
बलिप्रतिपदा आणि भाऊबीज
लक्ष्मीपूजनानंतर बुधवारी (ता.२२) बलिप्रतिपदा (दिवाळी पाडवा) साजरी होणार आहे. या दिवशी बळीराजाच्या स्मृत्यर्थ पूजा केली जाते. काही ठिकाणी पंचरंगी रांगोळीत बळीराजा व पत्नी विंध्यावलीची चित्रे काढून त्यांची पूजा करण्याची परंपरा आहे. तर २३ ला यमद्वितीया (भाऊबीज) साजरी होणार आहे.